都要老豆有錢至得──捕捉私有化股份(2002-11-09)

所謂「一百歲唔死都有新聞」,筆者相信無人諗到一萬大元放在銀行一年只能收到一大元利息,但事實擺在眼前,又唔到你唔信。存款利率減,貸款利率亦同時減,有供樓的朋友一定會知,咁賣樓的人當然就更加知!素以數口甚精的四叔亦由恆基地產出面,向銀行借入五十幾億兩厘幾的銀團貸款,去私有化三厘息的恆基發展,實行「橫掂都要比人,益外人不如益老豆」。

跟住又有專業人仕表演數字遊戲:高過賬面值、低過資產淨值。David Webb已經去信有關方面,要求提高收購價,認為以收購價計,淨係恆發手頭上的煤氣股份已經超過恆發市值。問題係,既然係「益」老豆,做女的當然唔多唔少會蝕底。如果再提高價格,條數就會計唔掂,只要提價10%-15%,恆發的息率已經與銀行貸款平頭,仲要考慮埋利率有機會回升。而且煤氣市值以19倍以上計算,恆發市值以11倍以上計算,如果兩者以同一個市盈率計算,煤氣的市值需要折讓四成幾,這樣便沒有出手低的感覺。個人覺得收購價尚在合理水平,始終現金比等值股票值錢,更比恆發手上的物業值錢。更何況過去五年來買入恆發的絕大多數人都不用損手。如果小股東又學海港企業果班大帝咁玩法,最後只有一拍兩散。

每逢有呢D大股東派錢場面,都會有證券界人仕玩尋寶遊戲,當中更不乏信口開河發開口夢表露自己的淺薄無知,在報章便看到以下幾個十分離譜的推測:太古B、信和、晉利地產。

第一個推測簡直當證監無到,太古又唔係H股,點可以局部上市?如果太古大股東真係私有化太古B而證監又批准,咁大股東發行面值幾份之幾但投票權一樣的非上市B股,咁用幾十億都可以控制幾百億的公司喇!

第二個,就算做女的想益老豆,都要老豆有錢至得嫁!以信和集團有待撇賬的項目如此之多,D物業賣一間蝕一間,流動資金又羅晒去拍賣場威,恐怕佢有意都力不從心。我諗機會唔會大過新世界私有化新基、新中、新創建;或者世紀城市等有化百利保、富豪。

第三個仲離譜,講果條友一定係無睇過報紙或壹周刊洋服佬點樣用幾個假名「扮」有足夠公眾持股量,玩謝小股東。如果有人聽左佢的意見真係走去買呢隻股,我諗同星期六賣旗籌款一樣,錢就比左,張紙可以貼上心口,當做善事羅!

個人覺得玩呢類尋寶遊戲有點多餘。相信讀者都記得筆者曾經講過12有機會私有化97,但筆者無買過,因為一日大股東不出手,一日都係得個等,就算真係守得雲開,個月亮可能只係兩三成的利潤,機會成本太大

當然,如果有人係都要玩呢個遊戲,筆者都可以講一D較為合理的對象所具備的條件:

1.老豆要夠錢,仲要D錢無乜出路,現時有兩三個財團有咁的條件。
2.阿女都要有錢,如果周身債,老豆無理由用錢買一堆債返黎。
3.阿女要有一定的質素,而唔係老豆根本就唔想要而掃地出門的,所以創業版公司成為私有化對象的可能性較低。
4.兩父女要有一定的協同效應,如果老豆係地產股,阿女係無乜地產權益的綜企股,咁合埋不如分開。
5.有協同效應也要合併的利益大於分開,所以中銀會合併,但匯恆唔會。
6.最重要的一點,老豆要對個女有咁上下的控制權,例如起碼超過50%,甚至接近75%,老豆先至會的起心肝行埋果幾步。

如綜合以上條件,個人覺得以下公司有機會:

長和系:長建
恆基系:美麗華
會德豐系:新亞、聯邦、海港
太古系:港機工程

免責聲明:本文並非投資建議,亦不構成任何買入、賣出、拋空、平倉、PUT、CALL、LONG、SHORT等行動之明示或暗示,更不會對未來可能或不可能發生的事情承擔任何責任。股票價格可升可跌,投資者應自行衡量風險。

 

 

 

原載:http://www.tokuhon.org

Categories: 投資理財

Tagged as: , ,

發表迴響