有些人希望自己一買就升，有些人卻鍾意檢便宜貨，其實係兩種完全不同的理念，由此理念而衍生不同的買賣行為。

假設某股票的資產淨值是$10，該股票在過去三個月由$12跌到$8.5，究竟應不應該入貨？對於見「平」野就插旗的「紅旗派」黎講，八五折？好抵喎！但係對於見風轉舵的「東風派」黎講，跌開有條路，梗係唔諗喇！大家可以思考一下，前者是「花」(FA)，後者是「他」(TA)的典型。

當然，這是一種簡化了的想法，基本分析派唔會單單因為有折讓而飛身撲入，技術分析派亦唔一定順勢而行，究其原因是分析方法與理念之間的不協調。

舉一例，地產股價與資產值的關係是各類行業中最大關連，因為地產公司出售的貨品是物業，某公司有多少物業如果全賣掉理論上是可以變為該公司的營業額，而當中成本與售價是盈利。不似工業或貿易股，其資產與營業額或盈利關連不大。可是基本分析的信徒也不會單以地產股的資產折讓作為買入的參考，更何況其他類別的股票？

這裏已經是以較為「操作性定義」(operational definition)來衡量何謂平或貴，大多數人根本純粹是以股價來定平貴，例如一隻股份做開$10左右，一些人見其跌至$8已經當作是「平」。如果用此心態看一以前的電盈、上實，或者是澳門賭股，便會被無情地懲罰。「紅旗派」見「平」插旗往往泥足深陷。

至於「東風派」最喜愛跟風，股價有上升的方向便入貨，甚至不惜在新高位搶貨，或者在創新低時出貨，即所謂「追入」、「追沽」。為甚麼很多時會一入就跌，一沽就升？無人去搶，市場又點會出現不合理的價錢？自己去搶埋一份，自然就最易摸頂撈底，難怪會一買就跌，一賣就升。

講到尾，無論係邊一派，不要因為平而搶，不要因為升而追，股價一係就求合理，一係就要唔合理得黎向自己傾斜。唔係話唔可以做對自己不利的事，只不過要承受不利的後果。

原載：http://www.tokuhon.org