與「輪」共舞──淺談認股證炒賣心得(2002-06-29)

近期大市波動,大幅上落,新聞組的網友也頻頻買賣窩輪,尤其是認沽輪,因其為較安全的做淡方法。正股郁少少,窩輪郁多多;做淡又得,做好又得;買單股又得,買一籃子股票又得,買指數又得,甚至買外匯的上落都得。當然,風險自然比正股高得多,涉及的技巧又高得多,這些資料很多網頁均有,大家可以按圖索驥:
http://www.sgwarrants.com.hk
http://www.kbcwarrants.com.hk

理論就相當充實,但是不是學全了就可以學某公司咁講「輸得少贏得多」呢?似乎很少地方有炒輪的實戰報告,小弟特以聽回來及親身上陣的經驗,以小品文形式,寫出來野人獻曝一返。

一、格老話晒事

2001年美國連減十一次息,股市自然跟著波動,某次美國聯儲局議息前夕,市場眾說紛紜,有人話減息利股市,有人話減息顯示美國經濟前景不佳。當時諗:無論減唔減息,個市都應該跌,一來好消息出貨,二來美國經濟前景真係好差,唔理三七廿一,一於買沽沽,結果一如所料,一減即仆,滿載而歸。

食髓知味,諗住果期美股應無運行,買定沽沽都無乜點錯,仲有個零星期至議息,唔駛驚減息住,點知格老玩忽然減息,結果中箭...

當市場由個別人仕的行為作出主導,買輪真係聽「他」由命。

二、寵妾滅妻

某地產股只有一隻沽沽,買賣盤集中,自然成為跌市奇花,「人地要走十分鐘的路,佢走一分鐘就到」。點知忽然有一日,無端端跌左兩成,但正股一樣係跌,點解呢?

原來因為另外一隻年期更長,認沽價更高的新沽輪面世,二奶青春可人,大婆自然冷落一旁,睇o岩正股都無用,半途殺出程咬金,一樣要輸錢。

三、無敵是最寂寞

升市買購購,跌市買沽沽,係唔係必賺呢?當然唔係喇!話說911後,好多購購都跌到仙級,跟住個市強力反彈,照計買購購一定有運行,係唔係呢?

梗係未必喇!當時大把購購完全無人承接,你掛入佢比你,你掛出佢啋你──都傻,渣家眼白白睇住d貨變廢紙,問你怕未?成交少的價外輪,差唔多係半張白紙。

四、有籃都無用

去年國內開放B股,國企紅籌炒到飛沙走石,當時有三隻一籃子國企紅籌窩輪,分別係國企、運輸、汽車。諗住漁翁撒網,點都中一瓣掛?

可惜,市場對單股的窩輪很大興趣,對於一籃子的窩輪無也興趣,炒唔郁,有隻仲無乜人承,結果都係蝕讓。最後三隻都位列仙班,變牆紙...

五、得了瓜籽,失了西瓜

話說小弟曾在911之前半個月買了當時的杜指沽沽1717,點知一買美股就升,渣無耐就止蝕,唔見左幾千,諗住留得青山在,那怕無柴燒。

點知個零星期後有人表演空中飛人,美股霖檔,一來一回,差幾萬銀...

六、有食唔食,罪大惡極

得到上次教訓,今次死都唔認輸,在高位入左恆指沽沽9066,點知無耐大市挾淡倉,一口氣挾到上12000,由毫級變成仙級,但恆指顯示出「污雲蓋頂」(或梁小鷹所稱的「黑手高懸霸主鞭」),當然唔想得籽失瓜,一於死守。

咁樣一守,終於比我守到6月26日。當日九點九比老細召去開會,十點半收到短訊話股市大跌,9066勁升,不但收復失地,仲有利可圖。個會開到十點九,當然即時飛撲問價,一問之下,當時諗住10380的支持力好大,可能會受阻反彈,咪諗住出貨先羅!當時買賣價係$0.214/$0.216,打穩陣波,用$0.214出,費事排隊。點知入左兩次,系統都話「拒絕接受」。即時打比服務員,佢話:家下承緊$0.217,因為你個價太低,入唔到機。下?低價賣都唔得?再睇圖:乜10380卜一聲就穿左,如入無人之境;再等下晝:連10300都穿埋,三次到底而破,當然睇定d先喇!

 

下午個市繼續跌,9066撲到上去$0.24,就排$0.24,點知出唔到,以$0.235收市。之後兩日大市反彈,連升兩日,本來有肉食,變成骨都無得食,又要再坐一會了...

 

原載:http://www.tokuhon.org

發表迴響