政府推出三幅細地皮供興建中小型單位，上周先賣柴灣及粉嶺兩幅，結果粉嶺地成功拍出，而柴灣地則流標。事後有人認為是發展商給政府下馬威，靚地就爭，條件遜色的則齊齊罷拍，而詮釋為地產商對政府增加供應採取不合作態度；進而認為樓市訊息可以在短期內作一百八十度急變，市區地也可以被收回，令小市民及政府均無所適從。
早前產業署拍賣郝德傑道宿舍結果因低價而流標，後來更重新招租，顯示一兩年內此物業均不會重售。筆者行山時路過，表面上是九龍半山維港景，實際上對落就是長沙灣天主教墳場，不單止是墳景，簡直就是「伴墳」。發展商就算要買也不會以溢價買，出價只會低到拍賣無人承接，招標就流標，是正常的商業決策，不知是否部份人欠缺此種常識？
政府中人亦出於各種政治考慮，而否認流標的原因，星島日報引述消息人士表示：「不認為是因為定價太高或有墳景而無人承價，強調是港島地，定價合理；若是指有墳景而無人承價亦不合理，因為港府的政策是全港十八區都設骨灰龕，換言之，根本難以推出一些無墳景的土地。」其後勾出的延文禮士道地皮，與九龍城基督教墳場只一箭之遙，但墳景已被幾間學校遮蓋，發展商亦可在開則上遷就。而柴灣地則被幾個墳場包圍，軍人墳場及西灣墳場更在斜坡之上，形同「伴墳」，加上地皮面積太細，斜坡太大，根本就欠缺發展潛力。就算發展商硬著頭皮發展，興建出來的單位又是否為市場接受？
地皮一如物業，同質性極低，坊間渲染某區地皮拍得好價就引致叫價上升，方今土地流拍就令到叫價受壓，問題是就算要比較地皮與現樓的呎價，也必須要就不同的質素作出調整。比如何文田山谷道村地價，可以與附近的居屋俊民苑樓價比較嗎？柴灣地流標，並不等如附近杏花村或藍灣半島也乏人問津，因土地拍賣價格不合心意而認為市場訊息混亂，實乃庸人自擾。
同樣道理長實天宇海的定價，明明是越推越高，偏偏有人找出7A座五樓D室即供價$4,170，認為平盡全區二手，說是越賣越平。從天宇海的7A座別圖看，該單位正是最接近馬鐵的座向，再加上是低層單位，將會受到西沙路及馬鐵噪音影響，以低於二手價售，又何來「頂爛市」的指控？
以新聞報導包裝的樓評，其目的並不是分析樓市，而是想借題發揮，對於大多數只是追求自我感良好而非入市的讀者自然沒有影響，但對於正要入市置業或投資者，就不可輕信此等糖衣毒藥。
筆者翻查地政總署紀錄，天宇海馬鞍77區地皮與壹號雲頂銅鑼灣山路地皮同於2004年5月25日拍賣，當時筆者網誌記下：「以超出市場預期地高價承接，甚至高到每平方呎樓面地價比現樓的價錢高！即時有人大叫『麵粉貴過麵包』，好似鵠鴻將至，地產代理、經紀個個大叫入市，業主反價，發展商封盤及收回賣樓優惠」。
是否似曾相識？相隔六年，唱好唱淡，傳媒均是我自為之。發展商睇市不是只睇眼前，今天拍賣的地皮，三至四年後落成，最快兩年後可以賣樓花，但今年出售的多塊地皮，連同各區重建的物業，最終將於數年後流出市場，若到時環球資金泛濫情況結束，樓市自會調整，此所以筆者建議各讀者亦要學習發展商放長線睇樓市。
國內簡體版：http://blog.sina.com.cn/tokuhon
今天拍賣的地皮，三至四年後落成，最快兩年後可以賣樓花 ，最終將於數年後流出市場。<– 各發展商的預期 (已知因素) 若到時環球資金泛濫情況結束 <– 這是未知因素 那麼發展商不是要承擔此風險嗎? 但大部分皆積極，預期2-3年後仍是正面喎? THANKS
[版主回覆10/10/2010 08:08:00]做生意當然要承擔風險，但做地產而唔儲地，幾年下來就被淘汰出局，對於他們來說更重要。
脫苦海兄所言甚是, 傳媒時常作嘩眾取寵既分析, 好容易誤導人。 ^.^!
[版主回覆10/10/2010 08:08:00]根本佢地就唔係分析緊件事
我認為而家以經有好多中型既發展商" 被淘汰出局"好似華X,合X同太X都得反好少好少地.第1個前幾個月都要賣車位,樓賣一個少一個,拍賣場上次次都係想要但係比人打低,本人相信佢地都冇咩土儲.第2個呢上一季連馬場景既出租物業都要賣,財經節目"每日樓X"話佢既收購成本高,而家呢個超高價都冇咩profit.而家得反灣仔既合資市建局重建項目,未來我都係估佢都冇咩樓賣(除喜X街外).第3太X之前好似想搬家咁,得反星街和附近少少.不過佢好彩都知錯,近呢1-2年都有買地.
[版主回覆10/11/2010 21:22:00]其實仲有好多間，如乂隆、乂昌、乂豐、麗乂、置乂、會乂乂，低位唔買地，高位就無樓賣，咁又錯過左一個大浪。
另外,有D細細地既發展商反而漸漸變大.好似英皇,公司細細地都可以keep住呢幾年每年賣1-2個盤(雖然賣唔晒)好欣賞佢連市建局既蚊型地都入標,長久來說都仲可以揾到少少錢.
[版主回覆10/11/2010 21:20:00]得個地盤都要囉出黎賣，套左現周轉左先，要上軌道尚要多一兩個浪的努力。
最後我都好欣賞遠東,佢雖然錢唔多地唔多,但係佢仍然努力買地,地細都唔緊要.今次既留言可能長了一點,請見諒!
[版主回覆10/11/2010 21:19:00]荔園本來係遠東集團的，後來都係讓左比長實，其實該公司的策略已轉向酒店業，近年已少起住宅。
脫兄,
今日出新聞話又起海景公屋, 都唔緊要, 係舊聞舊政策, 但最有趣係訪問會被遮既居屋居民同西貢區蟻員. 前者話唔想俾人遮唔係咁好, 後者話居民怕公屋居民會有衛生同治安問題, 而果個居屋屋苑卻係有6成人由公屋搬入黎.
拎左著數就唔想俾人合法地遮, 又歧視自己既前身果下好笑. 靚地起公屋, 人地住既唔會多謝你, 覺得應份, 係佢附近起骨灰位又黎x爆你. 海景我要墳景唔俾黎. 香港政府令人痛心. 浪費納稅人既錢. 大量供應海景地只俾起600尺私樓再規定即時要動工唔盡屯地. 唔信樓價唔跌或平穩. 依家走去起公屋. 咩思路!!!!!又蠢又弱勢又俾窮人搵盡著數既政府. 真正中間唔上唔落果d反而被迫死. 都係果句. 一係做扮窮人. 一係上衝做上等人. 中下永無好結果.
[版主回覆10/11/2010 21:18:00]物業前面有塊地，如果要唔遮，一係丟空，一係做公園，做學校警局都有幾層遮喇！寶盈東南西三面都係地，咁可以點樣？ 如果話公屋有乜乜物物問題，咁居屋亦可以被人話有乜乜物物問題，成個將軍澳南，得一個寶盈係居屋咋！難道附近其他私樓又會指指點點嗎？ 所謂坭水佬鋪門口，過得人過得自己，香港就係有咁多過得自己過唔到人的人存在。
Dear 脫苦海兄, any opinion about One New York? its price is still around $5000, relatively cheap in kolwoon nowdays with brand new flat, is it a good deal to buy to live?
[版主回覆10/11/2010 21:09:00]買來住尚可，投資升值則欠理想，主要因為地段及開則問題