三個和尚有無水食？恆地銅鑼灣尚匯先出馬，據報導4月1日一晚沽103戶，佔總數近六成；新地元朗尚豪庭則在4月12日一次過盡推三百多個單位，截稿時未知能否１Ｑ清袋；反而曾多次以一次過盡推單位的長實，雖然洪水橋尚城最早做宣傳，地產代理窗櫥一早貼出海報，卻沒有一次過推出，第一批價單遲至4月12日下午才出108伙，然後再加推兩批234及147伙，總共489伙，相比於全盤734伙約三份之二。
三個大發展商顯示出的不同推盤策略：恆基一如向來作風，先將物業較平單位推出，然後慢慢賣貨尾；可是長實與新地卻似調換了角色──長實今次擠牙膏賣樓，新地卻一反出售峻弦、譽．港灣、Yoho Midtown等擠牙膏方法，來個「集中所有兵力」的決戰。
坊間及網上即有些人大造文章，認為新地一反常態地以「要錢唔要貨」的方式賣樓，是睇淡及市場見頂的訊號。其實一Ｑ清袋不是長實的專利，就以筆者的記憶，九龍城獅子石道1號、珀麗灣第一期、北角型品、大角咀型品．星寓等，新地都是用類似的手法，一開始就盡推（能否清貨是另一個問題）。就以獅子石道1號為例，真的一日沽清，但接貨者一樣可以賺到笑呵呵，這樣解讀為新地是睇淡後市才急推樓，恐怕是捉錯用神。
甚而有些人作進一步的曲解，認為發展商急於賣樓，然後大市回升，就表示跌眼鏡睇錯市，筆者認為這是「以散戶之心度大戶之腹」。做股票可以有好多手法：短炒係方法，每次賺5-10%就走，然後拿回本金再找尋下一個賺5-10%的機會；等足一個浪賺幾倍亦可以；甚而死渣爛渣後生時買落，臨老才賣貨亦可以。同樣道理套落地產行業亦可：大型屋邨小炒家用短炒方法，化完粧就賣；買樓收租一個浪咁炒亦得；一路住一路等升臨老至賣套現養老亦可以。
偏生成功的發展商（地產行業的一個分支）只有一個模式，就是不斷買地、不斷起樓、不斷賣樓，套完現再買地再起樓，周而復始。利潤當然有部份是來自不同時期樓價起伏時低買高賣，但絕大部份卻來自「低價買地，高價賣樓」。舉個例子，Yoho Midtown每呎樓面補地價大約八百元，呎價卻賣五六千。對於成功（留意此二字）發展商來說，能夠做到貨如轉，資金從地皮、建築、賣樓之間轉換的轉數越快，賺的錢就越多。無咁成功的就一個地盤起十年，人家可能已賣了三四次樓。
香港五大發展商，都是用貨如輪轉的方式經營，所以別表錯情了，發展商怎樣推盤，只是個別環境下的策略轉用，並無甚麼玄機在內。尚城有七百多個單位，尚豪庭只有三百多個單位，已決定了推盤的快慢，況且新地未來幾個月還有數個價碼及單位數量更大的樓盤推出：屯門站、瓏璽、56區等，把較次要的尚豪庭一次推出，乾手淨腳，不應視之為睇淡。
早安,我諗未來還有對手是一個原因,另外會不會是因為政府拍賣呢?一時之間9塊地,隨時動不動都過百億,所以要周轉.況且新地既開價都好高,都冇咩水位,一次過賣晒都OK.長實就唔同,佢比附近1手新樓(新地既,唔係尚豪庭)都有幾百蚊discount,所以仲有D水位,慢慢賣,可能遲D仲可以+價.
[版主回覆04/16/2011 13:59:00]果幾塊地之中，有幾塊係幾十億至過百億的規模，尤其是港島區果ｄ。雖然新地剛剛才獲銀團貸款一百幾十億，但套下現都係好事。
老實說, 我認為係想出貨多
佢地大把錢,根本唔需要沽貨買地. 坐貨對佢地無風險,家族生意,對股東不用太多交待.
屯門係新地既大 project, 點解要咁快係第三季賣? 如果新地無死錯人, 我覺得最高位, 應該係2012年中前.
[版主回覆04/17/2011 17:32:00]未必塊塊賣得出，發展商可能會玩野，例如東涌、元朗之類。
以散戶之心度大戶之腹 ,topic起得真好!!!散貨係好正常既行為,做生意既product起左貨那有不賣之理!!!香港地打工的人多做生意既人少,至會唸出呢D咁反智既論點.最近發覺生果同方向對樓市既睇法南猿北徹,新聞有晒預設立場,要入市最好親身睇樓感受下果氣份.
[版主回覆04/18/2011 18:50:00]報紙電視大把人咁講
無論長實或新地都好，只要該樓盤在大西北或較次地段，一炮過推出是很正常不過的事。在這些地方，要錢好過要貨。 你幾何會見佢地會咁樣推半山樓?
[版主回覆04/18/2011 18:49:00]屯門站及５６區可能會慢慢賣，好似峻弦同譽．港灣咁
新地在將軍澳地鐵上蓋既項目都己經起到八八九九啦,但佢哋都未攞出黎賣.唔知咁又因為咩呢?想賣貴d?(因為己經唔係樓花嘛)
[版主回覆04/18/2011 18:49:00]筆者估：先賣筲箕灣，打個折將將軍澳樓當港島樓賣！
屯門有幾項大型基建發展,如屯門至赤鱲角連接路、港珠澳大橋落腳點, 屯門西繞道等,經屯門往返大陸愈來愈方便,請問脫兄對 屯門樓未來前景有何睇法?
[版主回覆04/21/2011 00:22:00]http://finance.discuss.com.hk/viewthread.php?tid=14279998&extra=page%3D1 筆者覺得，屯門之前係交通改善，黎緊幾年係社區改善，包括低收入住戶會轉去更邊緣的區域居住，九龍工作人口繼續遷入，而發展商起的新樓，將會完善屯門區的俄羅斯公仔結構。 更詳細論述，請看即將出版的《智識揀樓》2011-12年版。