十多年前係無人用「財技」一詞，多數用「重組」、「再融資」、「改組」、「註銷票面值」等等名詞，內容具體，人人一望而發生緊乜野事，但自從日本人發明「財技」兩字，並傳來香港，就不斷有人用呢個字造文章。兩手空空狂借錢吞併老大帝國又話自己用「財技」（點知債海難填），教政府印公仔紙套玩買返自己的資產又話「財技救港」（點解政府唔直接印公仔紙？搞咁多野比佣你班人賺？）。各大小上市公司賣弄小聰明反為害己者更不計其數。

最近有人問筆者美洲大陸重組有無陰謀？筆者就唔覺得係乜野奸計，而係大少爺鍾意無果樣整果樣，好似食碟頭咖喱牛腩飯咁：有人鍾意在碟白飯中開一個洞，倒ｄ咖喱牛腩入去食；有人鍾意一羹飯一羹送咁食；又有人鍾意一野將成兜咖喱牛腩倒晒落碟飯上面；大少爺鍾意將ｄ白飯一野倒入兜咖喱牛腩入面食，唔理個兜裝唔晒飯加送，結果就係個細碗多到滿瀉，隻大碟空空如也，吹佢唔脹。

分拆左係唔係一定有著數呢？好耐之前有篇文寫過分拆上市，其實最搞笑的分拆係明明間公司斤兩唔多夠，但係係都要搞分拆，例如某藍籌工業股以紡織起家，擴至地產，卻忽然分拆地產業務上市，結果兩間公司都變成冷門股。另一間是做甲殼動物發大達的工業股，又學人搞分拆地產，拆完咪等如一碟揚州炒飯，要分拆「蝦仁」、「青豆」、「蛋」，剩返的係無送飯，搵鬼食咩！某墳場地產公司早前曾傳出分拆機見業務上市，以集資興建去滾大橋，唔知個計劃擱置左未，否則咪又係製造多兩隻冷門股！

將成兜咖喱牛腩倒晒落碟飯上面的玩法反而多成功例子，例如洋行吞併船塢，新地吞新城，只要裝飯隻碟夠大，裝得晒ｄ飯送，唔會倒到一地都係，呢個玩法諗得過，因為成碟飯大左，又好好味。成功的關鍵在於：淨送太咸，淨飯太淡，一拍即合。但係隻碟唔夠大，就會好似網泡吞電話咁，搞到阿蘭嫁阿瑞，累鬧累，害死股東，自己變成過「楷」老鼠。

另外一種較成功的玩法係透過左手交右手一來製造盈利，二來減低控股資金成本，三來為附屬公司帶來穩定盈利，這次成功的個案正是小島燈膽重組。當年燈膽頭以附屬的洋行收購小島燈膽，先將非核心業務拆出來，拆出來的部份的土地資源搾乾搾淨，並由洋行私有化，剩返的係類似債券的供電業務。後來洋行將機見業務分拆上市，變成洋行左手拖著燈膽，右手拖著機見，這種控股手法的缺點是會重覆積壓洋行的控股資金。剛巧機見公司盈利有欠穩定，影響融資成本，洋行遂將燈膽賣給機見，一來可以製造大量非經常性收入，二來可以改善機見的盈利質素，三來仍然保有燈膽，一舉三得。

另外一種好高章的玩法係「伊拉克吞科威特」，當年伊拉克打伊朗欠下科威特大量債項，老候諗到一個一石二鳥之法：索性吞埋科威特，一來唔駛還錢，二來低價吞埋人地的資產。呢個咁高章的損人利己之法，原來香港都有人玩。惡少的地產公司有間附屬公司借了很多錢給地產公司，惡少索性低價私有化左果間附屬公司，欠錢唔駛還，又可以低價吞資產，只不過受苦的不單是科威特人民，而是附屬公司的小股東。

當然，如上所述，最失敗的重組方法是美洲大少果種：左手交右手，搞到左手粗過腳，右手幼過香雞。一間欠大債，揇晒大比唔知有無效益的業務；另一間大把現金，用黎做燒錢業務。咁樣玩法，兩間公司都變成畸型怪物，連累埋母公司。呢ｄ機關算盡的聰明笨伯可謂世間罕有！

任何對於精簡架構、業務分工或改善融資沒有明顯幫助的所謂重組，都只係玩剪貼遊戲。等而下之者，在架構重組上舉棋不定，左合右拆之後，右買左賣之後，仍然唔知佢地做緊乜野。明顯例子有會德豐系、遠東系、聯合系、信和系等。這些公司屬下的上市公司分工不明，架構重疊，基金大戶的興趣自然大打折扣。例如新亞置業與聯邦地產、遠東酒店遠東發展與遠東投資、聯合集團與聯合地產、信和地產與尖沙咀地產等，你能夠講出他們之間的業務分工嗎？