同樣地，上市公司的管理層也變相是為眾人做事，所謂「才德兼備」，先要有咁的能力，再有咁的誠信，人家才會甘心把血汗金錢交予管理，可惜的是上市公司的主事人每多像可憐虫一樣的「兩者兼無」人仕，莫講話要搞到公司業務有聲有色，要佢地把賺返黎的分小小錢比股東都好似切佢地忽肉。

會計上有所謂商譽，即賬面值高於實值的差額，美其名為「商譽」，其實說穿了就係買貴左野。真正商譽，揭爛本年報都搵唔到，亦是無法計算，亦無人知道佢幾錢斤，真正的商譽係管理層的質素，不單止係工作能力，更重要的是如何對待股東。

能力方面，管理層如何發展本業？如何擴展業務？如何找到商機進行新業務？面對市場競爭如何應付？讓大家看一下普遍的上市公司點做法：做地產的睇淡地產仲要沾沾自喜，行業飽和不是盲幹搶市場便是變相放棄本業，新行業人有我有，甚至為一個虛無縹緲的概念而胡亂收購，市場競爭就齊齊割喉。相信有睇開本欄的讀者都知我講邊個，唔知的話可以多多留意上市公司管理層的所作所為，十個有九個半都係咁。

至於品德，唔係叫佢地做聖人，亦唔係做道德重整會主席，最起碼的要求：要將股東當係自己的最終僱主！公司賺到錢會唔會不派息之餘仲要大加袍金印公仔紙比自己？有沒有用內幕消息炒出炒入？甚至會不會亂開支票，又話幾時幾時會派息，一轉個頭就供股收購業務。又或者會不會將自住物業賣比公司先賺一筆，然後連租都唔交，仲要以房屋津貼慳稅？再大鑊ｄ的就係自己開一堆唔知乜野公司，然後屈公司注資收購部份股權，甚至一轉工就幫公司收購以前份工的新知舊雨。大家只要細心諗下，自然可以對號入座。

講左咁多負面野，有無ｄ正面的野聽下？好可惜，幾乎所有好的公司管理層都係上一代的人，曹仁超曾在電台訪問透露，佢最佩服三個人，第一個係李嘉誠，因為佢夠晒高瞻遠觸，七十年代已經有個記事薄寫住未來十年要做ｄ乜，證諸佢主政時代的長實集團，真係能夠按步就班地發展，呢頭賣樓果頭已經計劃收購公司買地，和黃曾經在八十年代中期資金過剩，佢亦慷慨地派四蚊息比股東，而唔係座擁巨資或胡亂投資，八七年十月股災前佢全系供股１００億，當時係天文數字，用來增購土地，結果事後證明股東無白供，直到今時今日大跌市仍能企在當年的供股價之上。

第二個曹仁超佩服的係新鴻基地產創辦人郭得勝，因為郭氏事事以東家（股東）利益為依歸，從來不佔小股東便宜，有錢賺一定派足息，郭氏高齡退休後，經常到股票行買賣股份維持秩序。其實郭氏本有才具，四十多歲時才由洋雜店東主轉營地產，兩代人經三十年努力，建立一個龐然王國，難得的是兩代人均沒有搵股東笨的例子，即使係較具爭議性的事件新意網上市，公司也盡量保存該公司的現金，而非胡亂燒掉或借故據為己有，現在轉虧為盈，亦未負股東厚望。

第三個曹仁超佩服的人係李兆基，因為佢言出必行，收購別人公司時講明唔插手內政，就真係任由原股東繼續做落去，做到佢唔想做退休或者離世，因此恆基可以用低價購入公司，例如中華煤氣的利家、油麻地小輪的劉家、美麗華的楊家等，牙齒當金使一來可以買平貨，二來亦唔會對原股東利益構成衝突，至於恆基的小股東，亦因李氏佔大股，派息從不留手，甚至去年盈利大幅倒退也盡量派息。

當然，管理層出色的公司唔止呢幾間，股市初哥可能惘無頭緒，其實只要分析數年來公司的盈利有無增長、派息是否穩定，已經可以大致道一間公司的管理層的質素，如能進一步翻查董事袍金、關連買賣、主席報告的兌現程度，及留意公司管理層的一言一行，已經差唔多一窺全豹。好多出事公司，其實都係有跡可尋。