多份報章在周初高調聲稱周末二手市場交投上升，據說達七成之多，其實用一兩個周末的數據來比較，反映不到大趨勢，難道下一周交投又會再升七成？歸根結底盤少水緊的情況一日不變，二手市場的交投都只能低位徘徊。而成交之所以略為回升，是建基於賣方願意降低叫價，當這些「筍盤」被掃一輪，將要回歸平淡，畢竟在「借錢難、借到都唔平」的大前題下，二手盤要平價或折讓，才有人承接。

反而一手新盤銷情不俗，如新地奧運站瓏璽，連環加推連環去貨。某報有資深評論員說新盤賣得，是因為儲客預留夠數才推售，實則係逐個逐個斟返嚟，真係咁好市，又使唔駛pre-sale呢？查實新盤儲客預留，是發展商一貫的銷售手法，就算係上千戶的大盤，都會叫定代理收票，收夠至開盤，仲有得計超額，唔係邊得黎咁多一Ｑ清袋？

以前收票係計人頭揀樓，埋檯買樓一批批咁揀，一批與另一批之間相互間不知單位及價錢，被咎病為製造資訊不平衡；現在發展商先與潛在買家配樓，然後公佈價單後三天簽約，只係先後次序的分別，夠客至開盤，並不會因為有沒有pre-sale而有所不同。

瓏璽共有650個單位，新地西灣河譽都有117個，以單位數目計是中小型項目，而下一輪推出的新盤，新地西灣河譽．東只有79個單位，嘉里培新合作的上環西浦有149個，華置市建局合作的灣仔壹環有237個，五個新盤加在一起也只有1,232個，代理在二手成交冰封之下，只靠這區區新盤開飯？

所以下半年幾個大型新盤就是焦點所在，其中四月份已獲預售樓花同意書的新地將軍澳56區項目（未命名）有1,028個單位，可能是最快跑出的大盤；同系屯門西鐵站上蓋項目有1,091個單位，長實港鐵合作的將軍澳日出康城領都第3期共1,168個單位，新世界港鐵合作沙田車公廟站上蓋981個單位，以上三盤至六月份仍待批准預售樓花，加上56區合共4,268個，才是下半年龍爭虎鬥之處。

在現時青黃不接的時候，各發展商都是集中推售小型項目，比如新地賣清譽都即推譽．東，以至其他發展商接著推盤都以單幢細項目為主，其實他們都有較大的項目，尤其是以信和牽頭的香港仔、西九龍及大埔幾個盤，都是因為未獲批出預售樓花同意書，唯有先推不受限制的舊契樓。政府正立例將舊契樓銷售納入規管，要與其他樓盤睇齊，到時就未必有遠期樓花出售，賣樓亦沒有那麼自由。

令筆者感興趣的是，新地將兩個大型車站上蓋的售樓日期一再延後，甚至收到預售樓花同意書多月都不賣，有理由相信是出於戰略上的考慮，因為南昌站上蓋項目將於九月招標，而將軍澳66A地盤將於九月拍賣，不等不等都等了那麼久，難道臨買地才高價推盤？