「綠置居」（Green Form Subsidised Home Ownership Scheme）是政府繼居屋之後，另外一種出售資助房屋，除了第一個推出的新蒲崗景泰苑外，第二個是長沙灣元洲附近的麗智苑。前稱「綠表置居先導計劃」，是將一些新建的居屋，拿一兩幢出來拆售。

這個計劃是用來代替以前的「出售公屋」，即是「租者置其屋」，政府已決定除了已推出這個計劃的39個公屋以外，不會再加碼。換言之，是由「公屋居民買返自己間屋」變成「起間新屋比公屋居民買」。

改下改下，牛仔褲真的被改成了西褲，出售公屋被改成變相居屋，既然一個細地盤一至兩幢樓，咁同居屋又有乜野分別呢？除了市價由七折變成五折，或者建築質素較次，以及只售給綠表人士，白表無份。

本欄並不是論政，那些公不公平，是否偏幫公屋居民，是否雙重資助等等哲學問題留比其他人講，筆者是站在準業主的角度去看這個問題。

眾所周知抽居屋仲渺茫過中六合彩，唔好以為新樓又好得幾多，三千幾張票爭百零個一手私樓一樣係咁，所以有些人就希望用間公屋的綠表資格，提高中籤的機會。之前就有一單事件，是兒子拿了父親間公屋去抽置安心綠悠雅苑，結果大海撈針都比佢撈到，父親卻想打官司，唔要阿仔間置安心，想要返自己間公屋。

其實又係返翻去，為乜要上車？如果上車僅僅是為了解決居屋問題，租樓就可以了，既然屋企有公屋住，做乜又要去買居屋呢？說穿了就是希望置業來增加財富，但上車又想增加財富，就應該想一想究竟應該買邊一類物業。而且，要將公屋交出來，又搞到家嘈屋閉，又是否值得呢？