舊樓業主點解抱著層樓唔放，是因為樓市壯旺，點解自己層樓升咁少呢？呢個係人之常情，中國領導人曾引用一首唐詩：

巴山楚水凄涼地，二十三年棄置身。

懷舊空吟聞笛賦，到鄉翻似爛柯人。

沉舟側畔千帆過，病樹前頭萬木春。

今日聽君歌一曲，暫憑杯酒長精神。

（唐）劉禹錫──《酬樂天楊州初逢席上見贈》

股市有所謂「炒股唔炒市，揀樓最緊要」，其實炒股有得炒市，買ETF咪得囉！例如睇好港股的可以買2800，睇好A股的買2823，筆者睇好H股估值較低又最受惠於中國發展及回歸A股，咪買2828囉！但樓市是無得炒市的，買錯樓隨時會「沉舟側畔千帆過，病樹前頭萬木春」，到時真係「巴山楚水凄涼地，二十三年棄置身」。

「住得好好地，做乜搬」呢一類問題，正如筆者以前研究所得，樓齡最影響物業價值，其實是反映建築硬體的折舊，某些舊樓缺乏保養，硬體價已折讓到接近零，比如馬頭圍道45號J，之前有人開價到2200萬，業主還價2600萬，其實有沒有考慮到，買家不單止買入沒有價值的硬件，還要花成本來拆卸，單從土地價值，多出的400萬那裏來？

所以，死抱爛樓搏收購，實在不化算，因為機會成本太大；而自住其中就更加笨，人生真係怱怱果幾十年，經濟能力許可，改善居住環境本身已是享受一種，地產界名言：「早買早享受」，在大多數情況之下都是合理的。

所謂新舊，是比較的結果，當某區出現新的物業，就會出現換樓潮，如筆者居住的大角咀區，港灣豪庭落成時很多區內人買入居住，君匯港落成走一批，亮賢居也有一批人是由港灣豪庭搬過去，其結果是不言而喻，三者之間的樓價亦無謂作攀比，因不在同一俄羅斯公仔層次。