好些人不明白究竟發生緊甚麼事，即使無買此股也很好奇，點解數量可以咁多，點解有ｄ人可以咁平換股，又點解仲有間公司肯咁高價換股。原因是大家唔理解債券及可換股債券的本質。

據講今年香港擺脫財赤，又據講因為其中唔知有幾多億係官債，所以盈餘係假象，或至少有被誇大之嫌。本人就有個很有趣的問題想問：本人欠銀行按揭一百幾十萬，呢一百幾十萬可唔可以當係本人的財產，或者係收入的部份？

債券就係，你比錢我，我就印張欠單比你；如果我係政府就叫做政府債券或者以前叫公債；如果公司印的又係叫做債券，其實就係欠單。欠錢當然要還，以及比利息，借九十寫一百的叫做零息債券，可以還錢或者可以收股票的就叫做可換股債券(CB)。直接講，某公司發的如果真係債券，應該係借左人錢至係債券，咁借左果ｄ錢去左邊度？此疑點一。

理論上，如果借的錢越多，債券的價值就越高；一億元的債券當然比一千萬的債券值錢；如果只收象徵式金額的債券，價值就係象徵式；如果象徵式地借又象徵式地還呢？例如用幾毫子印ｄ債券比人換錢，然後再用幾毫子印ｄ股票比人找數，公司本身係無蝕底的，冤枉黎，瘟疫去，橫掂公司每股有形資產都係幾毫子，無乜唔妥丫！問題係當呢ｄ本來就只值幾毫子的股票在交易所以幾蚊交易，又有一班人用幾蚊去買呢？又係邊個損失呢？此疑點二。

既然印債券可以換錢，當然亦可以換資產，股權等等。我想買你間公司，但係我地兩間公司都無現錢喎！咁點算好？得！我公司（Ａ）係一間ＸＸ公司，你公司（Ｂ）係上市的，ＸＸ公司最值錢係概念，上市公司最值錢係套現能力，一係咁，Ａ公司賣ＸＸ的股權（紙）比Ｂ公司，Ｂ公司以可換股債券（紙）支付，Ａ公司再以市價（即係幾蚊）換Ｂ公司的股票（紙），然後Ａ公司將Ｄ股票（紙）倒去市場比fans接，接完咪有錢找CB條數囉！至於幾蚊點定出黎，市價麻！ＸＸ股權值幾錢？睇多ｄ愛情小說喇！為左簡化呢種關係（我都要劃圖至搞得清），請睇下圖：

公司　　　　　　　上市
股權　ＣＢ　＄　　股票
Ａ─→Ｂ─→Ａ─→Ｂ─→Ａ
＄↑　　　　　│股票
└─ fans ─┘

當然Ａ公司係只需要賣股票的一部份就可以將Ｂ公司的控制權囉到手，到手之後好多野都可以做，賣垃圾、供股、批股、再發ＣＢ、發董事酬金、請Ｄ親戚朋友做野，不一而足。

有人用賊船黎比喻，話說一架船班賊上左去打劫之後，見無料到走左去，然後由第二班賊上呢隻船，隻船本身雖然無錢，但係由於好多人想上呢隻船，上船的人身上有錢，咁咪再打劫多次囉！橫掂賊船之為賊船，係無需要有任何財產商譽的，只要一日有人肯行上黎，就有人自動送上門比人打劫，咁的船，點會無人駕駛？

P.S.既然有下集，當然就有上集，話說二十年前有一間電器公司，有兩個大股東，第一大股東係金先生，第二大股東係水先生，金先生將自己手上的股票拋晒出街，仲當眾宣佈自己一股不持，水先生順理成章成為股東，代價係股價被人掟殘，之後金先生低價自己買間公司翻黎。然後透過收購、供股，公司不斷壯大，玩得最勁的不是CB，而是濫發窩輪，詳見《股海秘辛》第一篇。