份份報紙好似約埋咁用「金融海嘯」，呢個爛gag筆者幾年前已經用過：http://hk.myblog.yahoo.com/tokuhon_blog/article?mid=583。說實話，這些自創名詞沒有嚴格定義，只為聳人聽聞嘩眾取寵，實在與筆者搞爛gag沒有分別。

原本本文是討論「AIG唔掂AIA保險有無得賠？」，既然美國政府願意出手，呢個已經變成假設性問題。但「AIG會不會累死AIA？」又不妨問一問，本來母公司出事，係唔會影響子公司的，即如匯豐點撇賬都唔應該影響到恆生，最多都係子公司賺少左母公司分少ｄ，比如國泰同太古，筆者都以為是理所當然。

可是今朝聽電台講，美國政府容許AIG使用AIA的資產作為抵押品，咁問題就大了！難怪會造成恐慌，皆因母公司唔掂，可以出售子公司的股權，或者出售子公司的資產派息給母公司，甚至由子公司借錢予母公司，但將子公司資產抵押的話，他日母公司無力還款，為甚麼可以用子公司股東的資產來頂數？這筆糊塗賬亦是理無可理。

市場第二個謎語是：點解救兩房，救AIG，安排貝爾斯登及美林股權轉換，卻任由雷曼兄弟連安信兄弟都無得搵？筆者認為，美國唔救兩房就沒有人買佢的債券，起碼中國日本會因此而大掟國庫債券；亦唔可以唔救AIG，因為廣大投保人亦是選民；美林是具影響力的證券公司，牽涉的人數太多；可是投資銀行(Investment Bank / iBank)是幫有錢佬管理資產，有錢佬輸左錢，唔救咪唔救囉！貝爾斯登事件被人非議公然打劫，則雷曼兄弟便是可一不可再。出身高盛的保爾森明知一群大鱷足有餘力拯救兄弟，只是想拖政府落水分享納稅人的錢，對於本來就是大鱷中人的保爾森，寧願由得佢死殺一警百。

與科網潮雷同的是，當年IT行業被奉為天之驕子，今期則以做iBank為榮，比如維他奶廣告暗示老豆要仔做金融，報紙訪問某個電視台台長中產母親，就係希望個仔他日入摩登士丹利！網上亦時不時有人問「點樣可以入iBank？」實則他們只是看到其豐厚的收入，而不知iBank是幹甚麼的。

筆者又要老老土土由三大產業講起：第一產業漁農礦牧，是天然資源的開發，比如農業股、礦產股及煤油股；第二產業是將原料變成消費品，比如衣服、鐘表、玩具之類；第三產業是服務性行業，即是如何將消費品送到用家手上，比如服裝店、百貨公司之類。

然則金融業是屬於第三產業，其實本質上又係做ｄ乜野？筆者對於這個問題詳作思考，發覺金融業只是一個字：Liquidity。沒有讀過經濟金融的讀者，筆者簡單地講句：就是將流動性（或變現性）較低的東西，變得更有流動性。比如人擁有油田，佢唔想整個賣比人，只想賣一部份而不影響控制權，就將油田變成股份公司，股份隨時可以變現金，亦可以用現金變回股份，這樣可轉換性便是流動性。

又舉個例子：有人想買樓，但又唔夠現金，就將自己未來的現金流（薪金）抵押給銀行，名義上是業主持有物業，實質上變成銀行的抵押品，如無法支付按揭供款，銀行就有權沒收抵押品出售，可是同樣地，業主有錢的時候亦可以贖回物業，這亦是流動性的例子。

現今所謂次按問題，就是銀行把本來不屬於自己的按揭資產轉售，再經幾手買賣後變為衍生工具，只要任何一個環節出事，就如火燒連橫船般，而美國樓市泡沫破裂後，是由頭燒到尾。Liquidity一香，金融業當然死晒！

所謂iBank，分別只不過是不拿客戶的物業按揭來賭，而是直接用客戶的金錢及資產來賭，賭下又包裝下，就變成如accumulator之類的工具，錢並不是因為賭技超群而贏回來，只是因為夠多客戶肯科款，甚麼人會這樣呢？之唔係那些世家子弟之類，比如用幾千萬叫人教跳舞之類，一如某些行業經紀要出賣親戚朋友開單，開到盡就被裁。

有投資老手講過，銀行業發展到商人銀行(merchant bank)就走入死胡同，因為並不是透過資產增值來賺錢，而是靠用客戶的錢來賭去賺錢，言下之道，賺的時候客戶大份自己小份，輸的時候客戶還會不會輸錢之餘再付佣金？而無論金融或樓宇市場，是從空氣中製造財富，又從空氣中消滅財富，賺蝕並不是個人努力或眼光之類，而是市場氣氛或「時勢」，不單止不可靠，而且必定是周期性，亦沒有可持續性發展可言。

回到最初的問題，AIG出事波及AIA，是出於美國金融業的混業經營模式，銀行可以做保險，保險又可以做證券，證券又撈埋期貨及衍生工具之類，問題是同是金融業，隔行如隔山，比如匯豐自廿多卌年前的獲多利時代至今，做商人銀行都不算出色，肯定不因為實力不夠雄厚或人才不足，筆者推測是企業文化問題，然則在混雜的業務下，企業文化難以適應，又沒有防火牆，結果自然就出現AIG拖累AIA，HI拖累HSBC了！

P.S. 再講一次面對現時的市況，從個人的角度要做兩件事：

1. 保護你的資產是重要，但保護你的現金流更緊要，尤其是自己份工，如果不是太穩陣的，要減債、減資產或套現。雷曼或AIG並不是蝕唔起，而是現金流乾涸致死。

2. 我認為在這個價格水平唔適合不問價出售資產，事實上股票的估值已很低，比如恆指跌到10倍P/E時大約是16680點，離目前不遠，如果等錢駛的，就賣一半吧！可是不要輕言撈底，皆因回升可能要半年至一年之後，一般人會覺得好痛苦，雖然這是不必要的。