根據上週五6月3日中原網站公佈，2011/05/23至2011/05/29期間中原城市領先指數99.43，距離1997年7月1日基數日100點僅0.6%。不過歷來最高點並不是100點，而是1997/10/13至1997/10/19的102.93，換句話說還要升多3.52%才算是正式創新高。
中原網站以前公開所有成份屋苑的調整呎價，而現時只能看到最近三年的數據，不過筆者一向都有紀錄，附表是當年58個成份屋苑（現時則共100個）於基數日的調整呎價，以及至今的升跌幅。
筆者事前無法估計到，表現最強的是薄扶林碧瑤灣，居然比當日升多65.5%！記得當年同區貝沙灣開售，開價五千多，筆者當時也覺得此價不可思議──既不是傳統豪宅區，又沒有鐵路站，又不是商業價值高的地方，憑何索此高價？市場永遠是對的，該區現已成為新一代的豪宅區域，難道真是八運大利「東北見山，西南見水」？
新的貴重地段因時際遇興起，也在九龍站出現，另一見證是灣仔區內跑馬地及大坑一帶，比華利山及嘉雲臺分別跑贏大市31.7%及40.2%，不過一落平地光明臺及會景閣分別跑輸9.1%及29.0%。尤其是會景閣居然輸成條街，實在是此料不及，筆者相信是因為當年實在是炒過龍，其實即如今天九龍站樓價又是否太高呢？
樓價亦反映到經濟轉型，十多年來工業北移，當年一些工廠區附近的屋苑如葵涌華景山莊、荃灣海濱花園以及藍田匯景花園及麗港城，均大大跑輸大市。筆者估計購買力較高的社群離開，以及居民收入增長較低均是可能的原因，惟待明年公佈的2011年人口普查數據再作分曉。
即使一區之內，亦可以見到樓價表現大有不同，沙田區內最強明顯是沙田站及沙田圍，接著是馬鐵沿線到馬鞍山，反而火炭駿景園居然比大市跑輸達28.8%！而樓齡已舊及有諸多管理問題的銀禧花園反而能追及大市，可見以高溢價購入較新物業，有時反而不及買低溢價的舊樓。
雖然屯門及元朗近年樓價異軍突起，尤其是屯門樓價在最近年半以來上升一倍有多，不過與當年比較，仍然是顯著地跑輸，甚至青山公路荃灣各段，如油柑頭的麗城花園，深井的浪翠園、麗都花園等均受連累。
上述各地，筆者仍然是較看好西鐵站四周的屋苑，一方面受惠於出市區交通改善，另一方面跨境交通基建如深港西部通道亦有幫助，具體現象是屯門市中心各商場的商舖檔次近年顯著提高，商業價值上升帶動樓價。
真係估佢唔到：碧瑤灣
It is because of Bel-Air
[版主回覆06/07/2011 22:40:00]連置富花園咁舊都可以跑贏大市，都係影子盤效應
單說九龍，脫兄如何評價尚未回家鄉的市區樓? 匯景和麗港城位置在環尾不說，市中心如又一居和黃埔花園為何還未見家鄉?
是市況未夠癲，還是這些盤風光不再，將無法回復當年光輝。
[版主回覆06/07/2011 22:54:00]有好幾個明顯跑輸的屋苑都係因為附近社區經濟衰落了，例如華景山莊、匯景及麗港城，都係因為工業北移，一班廠家富戶都離開了。 又一居都唔算係好落後，黃埔更大有機會因鐵路而追回，最令筆者費解的是會景閣，是否預示九龍站物業的走勢呢？
大部份屋苑都未去番97價，如果冇計通脹因素即係話個市未夠癲！
當然，樓齡大都要計番節舊!
[版主回覆06/07/2011 23:02:00]仲有一條數要計，就係低息，果時供過樓的人就知。 筆者當年供近200萬樓，仲辛苦過而家供500多萬樓。 理論上由74點上100點計，已經升左35%，再升多35%就真係癲勒！ 不過SSD令到ｄ人唔炒得樓，仲有無得癲都成問題。
脫兄,雅典居係咪少咁個零?
[版主回覆06/07/2011 22:59:00]已更正，謝謝
今次適逢大陸經濟升呢, 大班富豪湧港應市, 個樓市本應已癲過97好多, 但政府有左過去經驗, 唔想比超級樓市泡沫形成, 使出了SSD,
才令市況稍為穩住, 而大陸股市乏力同歐美經濟不起可能也有緩和作用, 港人對居屋可能復建既憧景亦有啲拉跌作用, 所有呢啲, 都有影響作用掛？？
[版主回覆06/08/2011 08:02:00]就係明知家下係海市蜃樓，先至唔好起居屋，置安心租五年可以落車，居屋無左回購機制，一去無回頭。
荃灣, 葵青區幾個當年 "豪宅" 今日仲係相差好遠. 當年廠佬有錢 (旺左 TW, KT), 今日做金融搵錢 (旺左西九), 下一個 cycle 係乜呢 ?
[版主回覆06/08/2011 08:27:00]可能旺屯門同古洞，近深圳
一起居屋, 嗰樓市實死直！ 恨買樓啲人, 梗係唔肯响淡市價殘時買, 我都幫唔到佢地咯.
[版主回覆06/08/2011 23:03:00]至怕到時班政客又跳出來，話政府這樣那樣害左班買家
脫兄的資料好詳細,由於九七時好多屋苑炒到癫,現在都未可以返家鄉
請問脫兄有沒有沙士見底時的資料,如有,可以比較各屋苑低位回升幅度,我相信見底後買浪翠園/嘉湖山莊未必唔係一個好投資的
[版主回覆06/08/2011 23:03:00]遲點貼出來
其他我唔知，新都城二期我朋友當年一手價286萬，上月市場同類成交430左右
[版主回覆06/08/2011 23:04:00]呢條數點計出來，都要問下曾淵滄
脫兄, 請問港運城何解如此落後?
[版主回覆06/08/2011 23:04:00]當年港運城當豪宅咁賣，今時今日只係該區平平無奇的樓盤，溢價無晒
會景閣出左咩事呀,我之前睇"豪宅年鑑"佢話會景閣係香港呎租最高既紀錄保持者,好似百幾2百蚊喎.唔係租金同樓價係會相影響咩?我以為佢實好貴…
[版主回覆06/08/2011 23:06:00]周顯在2012年發達指南答過呢個問題：玻璃幕牆，煮咖啡成屋都係味，而且有保養問題
脫兄 1. 似乎前面十年方向是以深圳前海做圓心幅射到屯門是穩中求勝啊？ 2. 沙田河畔蚊型樓，何解守得住？
[版主回覆06/08/2011 23:07:00]講到前海就太遠了！自從深港西部通道通車後，多左好多自由行到屯門活動。 河畔因為大維修，以及多左條馬鐵，家下已經唔算係上車盤。
唔係講迷信, 好多年前我睇過本風水書, 有人點名話碧瑤灣好風水, 話坐落什麼肉地云云. 事隔多年都忘記了. 但睇到原來升左咁多, 先至記得睇過呢一段. 睇下有無時間揾唔揾得返段文章先.
[版主回覆06/08/2011 23:45:00]八運大利「東北見山，西南見水」
三角形廳跑輸.
新都城係講一期97價達七仟蚊,二期99年開售已平咗一大截
[版主回覆06/09/2011 08:05:00]1999年中原指數全年都是五十幾點，到而家升一倍，條數就合理
其實呢幾年好多投資者入左去新界揾樓收租,理應會推高個價,但係點解普遍都係落後呢???
[版主回覆06/12/2011 09:25:00]新界樓近年已經升左好多，尤以西北為甚 如果你所講的落後是指新界樓呎價不能超越市區，相信呢個現象會長期存在
脫兄,
現在拍賣的元朗地, 地價都要 $4500/呎,
起好後最少賣 $6000/呎,
你點睇呀?
[版主回覆06/12/2011 09:24:00]塊地預黎起獨立屋，或者低密度住宅，與一般人住的多層大廈自然唔同價。 即使係咁，現時元朗站的Yoho Midtown都做到呢ｄ價，幾年之後發展商開咁的價，無乜出奇。問題只係究竟每一塊地每一個樓盤在區內不同位置，自會有不同評價。
呢幾個月D發展商行動有D可疑,南區有D收租既樓無啦啦賣喎,仲要萬多D一呎,以南區來說很底吧(我認為).另外發展商都+快賣樓,+快供股同銀團貸款,到底咩葫蘆賣咩藥呢???
[版主回覆06/12/2011 20:00:00]發展商在內地有土儲，而家內地水緊，梗係套現同集資喇！
多謝脫兄分析！送你夏日冬飲！買200-300萬樓長綫收租至兩年後可還有水位賺嗎？定還是買廠厦比較好？
[版主回覆06/12/2011 20:01:00]其實而家都無乜樓好買，已經無乜水位或要用溢價買，真係要買的話，睇得到兩年內有基建落成至好諗
脫兄：請問新屯門中心及嘉湖山莊尺價幾時可以見97價？有可能嗎？是否每個樓市泡沫爆破，落後區段都是最後爆升？
[版主回覆06/13/2011 22:29:00]新屯門中心的機會較低 嘉湖山莊相信都要下一浪 無論樓股，當炒到最低質素的項目，即表示無野好炒，資金亦將到盡頭，如果以樓市計，到公屋及居屋都喪炒時，應該都係時候
借用了你的表，http://hk.myblog.yahoo.com/luan-invest/article?mid=1207
[版主回覆07/11/2011 08:06:00]隨便
而現時只能看到最近三年所有成份屋苑的調整呎價的數據,請問那裹可以找到更長時間(如1997至今)相關資訊? 謝謝
[LAW回覆08/18/2012 16:08:31]I have replied your email already. pls check ^^
[LAW回覆08/11/2012 00:05:12]Thanks very much, you are really helpful! ^^
my email is : chrislaw3103@yahoo.com.hk
[版主回覆08/10/2012 20:05:39]1. 比錢中原
2. send e-mail問筆者免費囉
Thanks very much, you are really helpful! ^^
my email is : chrislaw3103@yahoo.com.hk
脫兄,留意到你話依家"無乜樓好買",但我公司飽受加租之苦,想自置小辦公室經營,請問你覺得九龍灣好定係灣仔好?定係留番錢等佢跌?
[waku_eagle回覆08/16/2012 01:25:51]多謝提點, 本來睇中九龍灣某甲廈, 點知業主兩次反價,加幅近15%, 所以追唔落手…當局者迷
[版主回覆08/15/2012 23:33:20]中環Ｄ租都開始跌，商業物業比住宅物業對經濟更敏感
黃埔最近都升得幾犀利, 如果想買來收租, 會否買黃埔新村好點呢?
[版主回覆08/15/2012 23:35:23]黃埔新邨都無乜放盤