呢ｄ新發財爆煲事件已經聽到厭，命運之神可能怕我地悶，就整單世家子弟爆煲事件比大家警戒一下。大家只要在chinese.yahoo.com打入「林秀峰」三字就可以知道來龍去脈。如果想知道更多，可以看看呂志華著的《香港股災重溫》中的〈股海滄桑「百寧順」〉。小弟唔係落井下石或在傷口擦鹽，而係想大家從這件事獲得啟示。邊間上市公司或其主事人有類似的行為就要多加警惕。但吸引筆者注意力的並不是這單案，也不是該篇文章，而是更早前《壹周刊》寫了一篇專文講述林氏的文章中的結論：「世家子弟鍾意做BIG DEAL，而唔考慮其可行性，自然是以失敗告終。」（大意）

無論新發財或世家子均會犯這個毛病，上市公司又何嘗不是？當一間公司動用超過其資產淨值２０％去進行新業務、收購公司、開拓新市場等等，便要打醒十二分精神留意。這個行動可以係一次十分成功的行動，例如長實收購和黃、新世界發展會議展覽中心、新地發展新城市廣場，以當時該等公司的規模也可算是BIG DEAL。成功了公司當然有大發展，咁失敗呢？

玩孤注一擲出事最耐可以追索到何啟周德發展啟德新村搞到傾家蕩產，而上市公司第一間咁玩而搞到出事係八十年代初置地以天價買入交易廣場地皮，若不是賣田賣地，電話唔要電燈唔要，置地一早人間蒸發。恆隆地產也曾一口氣競投多個地鐵上蓋地盤，結果要嘔返出黎，仲搞到管理層無信心搞地產，最近仲被人踢出成份股。太耐的事無謂講，近在眼前出事的公司有麗新收購富麗華、世紀城市百利保用天價投赤柱黃麻角地，兩者都搞到要債務重組。受傷較輕也有很多，例如希慎用天價收購娛樂行、鷹君用天價重建旺角、信和用近百億投天涯海角地皮等等。若不是這些公司底子厚，相信也難避厄運，但現在也是藥返都徒藥費，無復當年勇，被踢出藍籌行列是遲早問題。

而最近《信報》的原氏物語分析麗新發展的個案最能分析這類孤注一擲的真正問題。以麗展幾年前的資產淨值及借貸率，單單係收購富麗華唔會咁大鑊，最大鑊係因為收購了富麗華使到集團的資源同注意力集中ｏ係富麗華度，無出售零星的非核心業務，亦無再買入新地皮或地盤起樓，導致公司停止了發展及更新。我們試以同樣角度分析希慎、鷹君、世紀城市百利保等，何嘗不是一個餅印？