雖然朱總寫了「不造假賬」四個字，但係好多會計師同核數師只識其中三個，即使不是造假，造靚盤數一向都係佢地的份內工作，所以我硬係唔明點解演員們明知「賬面值」(book value)就算唔係假數都係預數(arbitrary figure)，比較兩間會計標準未必相同的業務性質差天共地的公司的賬面值有何意義？至於所謂應佔盈利，亦都全是過去式。明明泡埠「玩野權」已經在今年初開放，點可以用過去壟斷獨大時代的盈利比較未來將被分薄的盈利？

耶穌是用71%的耶穌祖國股權換取60%的合營公司股權，泡玩是用10.8%股權換取40%的合營公司股權。有一些疑點我唔係好明：這10.8%泡玩股份，是否新發行股份？如果是新股，則耶穌原本持有的5%泡玩將會攤薄為4.51%，與公布的數字不乎；如果是舊股，則該10.8%股份由誰沽出？原屬何人？以陰謀論觀之，或者是有人希望在家族糾紛中攤薄對方股權。該公司另一個大股東則為逃離是非圈，已放棄全部股權捐給慈善機構。加以開放玩野權後，旺船務酒店而未必旺三份之一的玩野權，點解又擒擒青出售兩成的泡埠地皮發展權？

至於「轉型」之說，要有舊業務先至有得轉，我們又看看耶穌原本的業務是甚麼，除了傳統的船務業務外，「耶穌中心」經已出售，所謂地產業務只是兩個重建項目，項目策劃及管理還要是另外一間地產公司擔任，耶穌只是保留該兩屋村的物業管理業務，咁同買一手匯豐恆生就自稱銀行家本質上有何分別？當然，主事人是地產佬商會主席，又成日播錄音機，演員們就當左佢係地產商，咁當然就是轉形喇！事實上根本無轉到。

而「策略聯盟」之說，唔係演員們自己諗出黎的，而是大小姐親口講的。辜勿論將股權由5%增至11.48%，由小小股東變成小股東算唔算策略聯盟，正如由一手匯豐恆生增持到十手都唔會變成銀行家，「去可聯婚」就話係「策略聯盟」姐，老豆同個女結盟又係策略性？耶穌的總經理及主席一早就係泡玩的董事，這種聯盟關係根本上一早存在，現在才說只是項莊舞劍，無野搵野黎講。

歸根結底，當某一個家族絕大部份的財富均不在上市公司之內，要求其以主要心力放在上市公司根本上係違反人性，最多只可以視之為其家族分散投資的工具，但係這個籃不會放金蛋，只會放跌不爛，又重又無人偷的石蛋，食之無味，棄之可惜！如若不信，可以看看大少爺做主席那間公司，或者看看有錢傻仔的便宜老豆做主席那間公司，如果你唔係小股東，肯定會心微笑！