香港地產市場一向光怪陸離，九七時半山舊樓以樓花價一半也乏人問津，此無他，窩輸一定比正股有溢價至有人發行；同一個樓盤，向海高層賣六千，向樓就賣三千，同一間國企公司，H股P/E20，A股P/E60，體現一樓兩價，一股兩價；同一地產商發展樓盤，火車站隔離做千八時，隔幾條街的新樓賣二千二仲要話係抵抵抵！就好似東亞P/E高過匯豐都被視為理所當然；房協混合式發展或土發重建項目，炒家竟然當係寶，要一層層咁「圈樓」，就好似科網潮時，唔理你公司做乜野生意，改個科網名就被人不問題地搶。凡此種種，見怪不怪。

目下樓市再起炒風，雖未見泡，然而已引起各界關注，不單有業主反會、賠訂，更有地產商抱怨政府不肯以市價勾地，亦有些人擔心買不起樓。大家回想大半年前，有樓就被人當係負資產，想買樓就被人當係傻仔，幾個月之後判若雲泥，話比人聽去年買左樓，人家就說你賺左幾十萬。其實這些市場現象，是一幕縱虎驅狼的活劇。

到目前為止，政府是全港最大的業主，眾多收入又同地產業有關，樓價地價上升，最得益的是政府，一個思維正常的人當政都唔會諗住推倒樓價實現「房產大躍進，人人有樓住，七成做地主」的荒謬理想，更唔會有「我地諗到一個方法，可以在唔影響經濟的情形下推低樓市」的狂言。地產有價，是最符合政府的經濟利益。

地產商的觀點則有很大分別。某些所謂地產商根本就志不在此，市淡時唔買地，市好就大鬧政府唔平價勾地，你老哥對個行業無承擔，人地又點可以就你一個？又有些是以貨如輪轉式經營，價升固然開心，價格穩定亦可以多年來的土地儲蓄做貨賣，對於政府勾唔勾地不太在意，更好當然就是唔勾。但多數的發展商經多年淡市消耗，土地儲備已用得七七八八，目前較多者為新地及恆地，信和的土地成本偏高，長實、恆隆、新世界等已面臨存貨不足。大家試比較各地產商的言論，對於佢地的貨底可知大概。

升斗市民呢？今時今日出黎炒的，相信並非當年果班，佢地多數都唔係轉行就係走左佬，目前果班很多根本是盲毛，用炒窩輪的水法炒賣變現能力不高的樓宇，初期入市者仍能找到大傻接貨，後來者用天價買入所謂豪宅者，如不收手恐怕累人累己。一般用家也因市價漸漸變得不耐煩，部份已不考慮樓宇實際價值而入市，現有業主叫價亦漸不理性，這樣下去增加了對後市的不穩定性。

綜合以上現象，可以總結到一個結論：各利益團體正使用一招「縱虎驅狼」的策略推高樓價，再浸泡泡浴。正如幾篇前所講，如果香港人口不大幅增加，樓宇根本上就是供過於求。那麼樓價何以會在短期內急速上升？答案就是玩弄羊群心理。

政府刻意把未來幾年的土地及樓宇供應凍結，居屋唔賣，兩鐵土地拖延建築及出售，勾地價天咁高勾極都勾唔到。地產商眼見手上土地儲備日少，未來要買則比市價還高，手上的樓花便盡量推遲開售，貨尾則吊高黎賣，相對於過去幾年每個月都有新樓盤出售，近期好多差不多落成的新盤也不申請預售樓花，結果就是市面上的供應在短期內大幅減少。炒家及內幕人仕見獵心起，即時加入搶購，後知後覺的市民會像羔羊一般被趕到懸崖邊了！

目前這個目的初步已達，下一步就是推出居屋貨尾試盤，然後再高價賣土儲表內的土地，進而出售西九龍、舊機場及新界西北大幅的土地，如果政府是夠魄力的話，前邊境禁區幾百公頃土地包括河套區就會出場。

大家還記得數篇前講過，從人口及土地供應量看，根本支持不了樓價上升，何以樓價指數卻能在短短大半年內大幅反彈呢？有炒開股票的朋友應有留意，股票市場是個別發展的，指數可以日日升，但有部股票係「官蓋滿華庭，斯人獨瞧粹」。既然部份購買力走左去谷起某些所謂炒盤，自然有部份弱勢盤被犧牲，正如在樓市低迷時所講，既然西九龍、將軍澳、馬鞍山、屯門元朗都是賣二千多三千時，點解唔買市區大型屋村？現在，這個現象已消失，西九龍已接近四千，近郊仍然是二千多，差價將日漸擴大。

另外一個可能性是，數字上香港人的收入的確下跌，但社會上總有一些人是逆流而上的，因此未來這類人住的樓宇價格自然較高，單幢樓、舊樓、居屋、出售公屋將無法跟上大市，有樓人仕宜把握時機，襯差價尚未太高時換馬！