年前年尾，會見到ｄ算命先生又上電視，又出書，有ｄ出埋ＶＣＤ，推算來年運程。證券行又會出一ｄ所謂風水指數。細心ｄ睇，其實佢地講緊乜？
例如十二生肖，算命先生會講，生肖屬Ｘ今年沖太歲，要點點點化解，生肖屬Ｙ的同太歲相合，會點點點好；其實，將全世界人分做十二份，某一種必定好，另一種必定衰，係唔係講緊廢話？正如財經演員講油價上升要沽飛機股，中國入世就要買汽車股。佢地其實知唔知，國泰、東方、南方在過去一季跑贏大市，而汽車股跌到死下死下？對市場一知半解，亦唔考慮個別股票之間的分別，拿住一個概念就亂叫人買貨，同推測董建華屬牛明年沖太歲所以明年香港唔掂有乜分別？
又例如算風水的，咦，今年利西南喎！仲唔去香港仔大嶼山買樓開舖？大佬，方位是相對的，屯門都係西南方，深圳的西南方，將相對講成絕對咪又係廢話！我地班財經演員見美國經濟復甦，杜指P/E幾十倍恆指就有大幅上升潛力；國際石油股P/E十幾倍中石油升一倍，或者好似某基建公司的主席以香港貨櫃港的長度遠比紐約上海為短來推論香港貨櫃碼頭泊位不足，究竟係無知定係別有用心？
筆者也略懂術數，學得精的人真係可以應斷如神，但係學得半桶水的招搖過市，在電視上大言炎炎，但稍為涉獵過術數的人都知佢地連好多基本的術數知識都無。例如某算命先生連陰陽曆都未識分，又有算命先生將八字中的神煞亂解，把凶星講成吉星。正如財經演員，技術分析學藝未精，基本分析似懂非懂，內幕消息半真半假，最經典係某財經演員答阿婆話港基好快會賣盤，賣到今時今日都未賣，聽呢ｄ不盡不實的分析，不如唔聽好過。
最後講將兩者結合的所謂「專家」。在台灣睇到好多呢類書，以易經測市者有之，以節氣測轉角市者有之，甚至用紫微斗數的流盤測個別股份者也有之，好彩我兩樣都識少少，唔會比佢嚇死，只會比佢笑死。