可惜好多人都以為自己好醒，好有理想，諗到ｄ所謂好正的IDEA，到頭來無人BUY就淨係識得怨人，究竟佢地有無反省點解會咁樣呢？投資都係一樣，明明係行緊熊市，係都要在電視上介紹潛在升幅10%，跌10%就止蝕的股票比人。有ｄ人仲犀利，因為美股在一百年前試過連跌四年，所以大大聲話因為跌左三年，第四年一定會升，否則便會破百年的紀錄云云。一件事，唔考慮客觀因素，只係單憑一己主觀的願望，再加上選擇性找到的所謂依據，便茂茂然去馬，結果當然撞板多過食飯。

筆者原則上贊成最消最低佣金制，但係我地的笨拙政府駛橫手夾硬推行，可以預期牆上又會多一大灘血漬！類似的保護性措施，本質上係抬高價錢剝削消費者，各式經紀包括證券、地產、保險、基金等等，應該係用服務質素去競爭，而唔應該用業內私相授受的規條減低競爭來生存。筆者也曾光顧某銀行的分行證券部，又無電話報價服務，又唔可以落止蝕盤，在櫃檯落單唔可以用電話取消，在甲分行開戶唔可以在乙分行落單，但收費卻是天價！可是天天卻有一大群嬸婆叔伯圍住分行的報價機鬥快按掣，你一言我一語，好不愉快！又好似家父咁，明明屋企部機可以足不出戶買股票，佣金又平，又有即時報價，佢偏偏日日搭車過海泡經紀行。點解？呢個問題唔應該由消費者答，而應該係果ｄ口口聲聲無左最低經紀佣制就會集體死亡的中小經紀攝高床板去諗！

如果話無左最低經紀佣制就會爆發割喉式競爭，仲會比ｄ銀行同外資大行用低佣食晒個市場，根本上就係廢話！銀行的佣金一向都唔平，減到現時最低佣的銀行都未有，銀行推證券買賣唔係為左爭市場佔有率，而係開拓非利息收入，唔通為左爭生意而減佣低於運作成本，甚至爭客爭到影響日常運作？至於外資經紀行，筆者都好有興趣幫襯佢地，果乜野鎖埋門、尾幫、大魔、碎銀、李戇、髮輕甚至裸褲齊，享受所謂尊貴服務．．．對唔住，閣下無一百萬美金，佢地幫唔到你！

至於中小型經紀點樣生存？筆者現時只光顧網上經紀，但係仍然覺得佢地佣金太高，因為佢地除每一天寄一封信堆滿筆者檯頭之外，睇唔到上網落單佢地為客戶提供到乜野重

大的價值！至於非網上的經紀，相信需要透過「非價格競爭」留客，例如部份經紀可以責數，可以賭白頭片即日鮮，可以提供打牙較、吹水、內幕貼士等服務，國內的證券行有客戶專用房間，派埋飯盒請埋靚女服務員，有本事咪扭盡六壬唔減佣都留到客，割喉都搶唔到客。相信短期內低佣經紀不可能大幅度進一步蠶食，實務的方向係諗辦法自救，而非向有關當局搖尾乞憐。

咁筆者贊唔贊成有關局呢個做法呢？答案係否定的！正當三年大淡市，成交縮到八十年代水平時，妄圖改變遊戲規則只係把本來要結構重整證券經紀業的責任揇上身，正如九七樓市明明會爆煲，搞唔搞八萬五都會發生，有必要拿屎上身嗎？正如隔離屋漏煤氣，醒目的應即刻走落街打電話報警，次一等係拍門叫人，只有傻瓜才會按門鐘甚至點洋蠟去叫人！！！不適當時候做適當的事，最後必然係不適當的結果！