話說有一間餅店，叫「波法比餅店」，是以一個美洲大城市及兩個歐洲國家命名，呢間餅店，一無門市，二無廠房，既不造餅，亦不賣餅，幹的是甚麼生意呢？
原來佢只係買賣餅咭，學名係「可兌換認餅證」(covered warrant)。當某些人送禮買餅，為免自行搬運不便，可以向波法比買餅咭；當有些餅廠銷流未暢時，可以向波比法購買「認沽餅咭」。如此這般，餅店在轉手間的差價獲利。本來，這不失為買賣雙方的橋樑。比如說：一打西餅賣$50，就發出一些面值$50的西餅咭，可以用$50的價錢向餅店要求送一打西餅；餅店收到咭後，便通知廠房送餅，並以「認沽餅咭」支付，餅店便套取了大量流動現金。
可是有一日，餅店的負責人度到一條賺錢的「好橋」，就係在餅咭多加條款。
以前的餅咭係賣$50換$50西餅一打，新餅咭係賣$10，但係可以用$45換一打西餅，行駛價雖然係$55($10+$45)，但一來送餅咭的人只需付$10，二來收禮人可以節省$5，亦係好過無，但係餅舖就賺多了$5，溢價是10%，袋袋平安。
第二招，就係炒貴ｄ西餅現貨製造「抵買」的假象，在發行餅咭前，先將西餅價調高到$60，然後用$52做換餅價，發行$10的餅咭，行駛價係$62($52+$10)，表面上好似溢價好低(3.33%)，其實西餅的真實價值是$50，溢價高達24%！
有時因為成本上漲，之前發行的餅咭可能要蝕本行駛，例如行駛價係$50，但一打西餅的製造成本上漲到$65，咁一打西餅咪要蝕$15？唔緊要，市價係$2，就用市價購入，理論上每一打係蝕$13($15-$2)，實際上蝕的是$2，因為發行商係唔會自己行駛餅咭的。
最賤的方法，就係當餅咭的價內值上升時，例如由$5上升到$7時，就自己做庄家，挾硬將市價質到$6，甚至有時以「加印」的方式增加市場供應，令市價自動下跌。
上面呢個故事，大家可能認為不可思議，邊有人用溢價買餅咭，又或者參與這種「明搵笨」的遊戲？呢個問題，可以請教窩輪炒家。