筆者剛從韓遊回港，發覺韓國的社會現況，竟與特區政府某些問責人仕掛在口邊的目標有所雷同，如：

買野用膠袋要比錢買，屋企丟垃圾要比錢買袋
街上極少垃圾桶，僅有的垃圾桶全是分類的，普通垃圾無地方丟
街上又沒有人亂丟垃圾

比錢買膠袋，還可以理解，比左錢，收返個袋，貴係貴，都叫做有野囉返。香港人會諗到，個袋要錢，否如丟出街囉！Sorry，周街都無乜垃圾桶，少到乜野程度？少到行街成半個鐘都見唔到一個垃圾桶，比你見到一個都係回收桶，唔係膠唔係紙唔係金屬，例如食完一條粟米，咁丟去邊？周街垃圾桶，ｄ家居垃圾就丟晒入去，家下無垃圾桶，比錢買膠袋喇！

在家居層面，據導遊講，佢屋企只有三百呎都要擺三四個分類桶，要自己分類，包括食剩的廚餘，結果就出現左一樣古怪事物：環保牙籤。以前南韓的牙籤全都是用木或者竹做，現在見到一些所謂環保牙籤，係用澱粉造，綠色的，個樣類似半透明硬膠。因為木竹牙籤可能會哽死ｄ豬，就發明會溶解的澱粉牙籤。牙籤唔用木竹造，筷子當然亦唔會，木、竹、膠都唔環保，咁用金屬囉！記得十幾年前去韓國，ｄ金屬快筷係無咁重手的，去到南大門市場，原來唔同重量的筷子個價錢係唔同的，一對金屬筷子可以用幾耐？我買左幾對，睇下幾時爛囉！

廖秀冬話大廈每一層都要有分類桶，人人家中都有幾個垃圾桶搞分類，要用多幾多膠或者金屬？香港有二萬幾戶，當佢每層有廿戶（因為香港半數是公屋），即係要有三十萬個回收桶（藍黃啡各一），每天要用多三十萬個分類袋。現在一般用的家居３１裝白膠袋，因為唔駛印野，同時可以批量生產，可以開定機吹定一大批擺，要搞分類袋一係就印字，一係就著色，甚至要印條碼(barcode)，樣樣野都會令到生產成本大增。

最關鍵而又香港行唔通的，就係周街無乜人丟垃圾。金礦景點都有講，亞洲金融風暴時，南韓國民熔金救國，我即時諗到的係，香港人一定第一個買飛機票走，邊個同你熔金？後來再諗深一層，最無國家觀念，最唔真正愛國的，並不是香港人，而是中國人。點止香港人會買機票，國共內戰時ｄ人固然走佬，南越解放時華僑何嘗唔係咁？在個人沒有直接損失或損失可以接受之下，中國人可能會幫自己國家，但要佢地學日本人咁連條命都唔要或者韓國人咁傾家盪產，佢地唔會囉！更何況，香港流動人口較多，本地人唔丟，外來人呢？外來人係無責任愛呢個城市，莫講河北人次陸人黑洲人，白洲人一樣有丟垃圾吐痰亂過馬路，罰千五一樣有人丟，丟在家裏要比錢，點解唔丟出街搏下？

香港呢ｄ所謂決策官員，究竟對前線呢ｄ野點樣運作有無認識？有無問下ｄ物業管理公司清潔公司成個流程點做？垃圾分晒類，咁清潔工人ｄ下欄去晒邊？清潔工人執晒ｄ有用野賣，咁回收公司食乜？成個垃圾處理流程制度化，阿婆仲有無得執紙皮同汽水罐？根本分類垃圾賣野，係社會上好多人收入的一部份，水清則無魚，當乜野些微的利益都要制度化，正一係草都比佢地算死。

當然，廖秀冬之流係唔知或者知都唔理辦公室以外發生緊乜野。如果佢知，點解可以在油價屢創新高，巴士司機搞到罷工之下，夠膽應承市民巴士可以減價？

相信除了服兵役之外，在香港某些上層人仕心目中，香港就會改到南韓咁，又深綠環保，又銷售稅，又醫療保險，遲ｄ仲想搞公營學券同醫療券，擺明蠶食私營部門。「小政府，大市場」，改個標籤換個名就由政府變市場。韓國政府資助電影，又想學埋一份，仲有人異想天開，講埋呢ｄ野：

電影編劇家協會會長莊澄歡迎港府計劃，認為有助本地電影業發展。寰宇電影負責人林小明表示，港府要清楚定出投資原則，以免出現不公平情況；同時港府只宜參與投資，不應干預電影製作的取材。

你地咁鍾意學人，移過去囉！