兩份免費報都有教人職場生存之道的專欄，先有AM730的CK人在中環，近期有富利堡的黃毅力。筆者覺得黃毅力的內容比較實用，而CK很多時流露出打工時的被統治者心態及沒有必要的婦人之仁，以至於讀書人的頭巾氣，例如成日話伙記走人是不是自己做錯，伙記高就唔捨得之類。
辦公室是做事的地方，人情感情只係點綴，今時今日當然仲有人以為某某得勢，係因為某某老細睇得起佢，所以做盡小動作搏得老細歡心，以筆者多年的冷眼旁觀，淨識擦唔識做，一樣會失寵，特別是老細真係遇上麻煩的時候。做好自己工作，再加上一點鞋油，係好多人的成功之道。做唔到野，老細都覺得長貧難顧喇！
舊管理層比人剷走晒，點解唔順手剷埋佢個friend？只有兩個原因：一係佢根本就唔起眼，一係佢根本就無問題。清兵入關都要靠吳三桂洪承疇喇！個新老細又好人，又有料，可能仲肯過料添！大家三唔識七，人地唔會無條件無代價付出信任及放心，究竟呢個員工做過ｄ乜野去搏取新老細的歡心？
其實一如後母與繼子，做人繼子難，做人後母難道唔難？繼子／後母仲話有血緣之爭，老細與伙記，言必曰利。你認為新老細忌你，你咪又係忌你個新老細？咁又要轉工呀，要轉幾多份工？好多人在大公司打大半世工，連三十年服務獎都囉到了，難道這個人只跟過一個老細？就以筆者為例，平均兩年換一個老細，至今換了四個，如果又要轉工，咁就要轉四份工了！
呢篇文講果位女士，我唔覺得佢老細有乜問題，老細唔信伙記是奉旨的，人地處得高位，自然深明交換之道，你唔首先主動樂意地交個忠心出黎，難道要老細首先主動樂意地向你奉獻殷勤，訂埋檯食飯直落？
前朝遺臣不易生存，問題往往出在那個「遺臣」身上，有一位古人可學，叫馮道，老細不斷咁換，個個都請佢打工，打到兩腳伸直為止，點解？茲引兩文：
我日日睇AM730都有睇CK, 不過唔係跟佢學管理, 而係當八掛辦公室政治咁睇。CK的確係有D婦人之仁, 而且個人比較短視, 胸襟狹窄, 無咩大志,好明顯都係鍾意人地擦佢鞋果隻。
素黑真係掂呀……我成日懷疑佢d case係作出黎, 但一樣咁多人睇, 唔通真係咁多人都心靈脆弱？