商而劣則仕

幾年前「西方國內」的主席做了我們的痕正掌冠，政績人人有目共睹。古人講求修齊治平，先修身，再齊家，後治國，才去平天下。一個人塊面發水腫頭髮花白偏偏走去剪陸軍裝，成個龜頭咁難怪在外人面前語無論次思覺失調；老婆霸道人人知，公司搞到一團糟。修齊做不到，自然不能治平。

原來怪事係可以再次發生，「花王之王」間公司賣花可以好賺過微軟，花圃據講可以大到十幾公頃，仲有私己錢可以起主題公園同埋地產項目。有國內傳媒得登走去據講十幾公頃大的花圃，原來只有兩公頃開發左，其餘尚在開發中，最新公佈邊際盈利大幅下降，高級行政人員突然辭職，正當大家滿腹疑團之際，主席竟然無厘頭走左去做凸手！其實呢個新工幾ｏ岩佢，百寒最鍾意架戴胸，搵個咁架戴胸的人做凸手適合不過，小股東唯有自嘆唔帶眼識人。

究竟公家定係私家？

上面果個係光榮著草，以下呢個係黯淡著草。朱古力砵砵車前果排無端端資產收歸國有，主席失。正當公司陷入一片火海之際，主席突然在太平洋的對岸出現，仲死口咬定自己間公司係「聞屁」。但係原來所謂「收歸國有」，只係將資產由財政部撥比地方政府。即係話間公司的資產根本由始至終都係阿公ｏ既！

其實諗深一層又唔奇怪，百年都市早排曾經試過以數十億注入國內電訊牌照，說穿了即係只有牌照沒有資產；易淥親又試過真金白銀興建身痕電訊網絡，後來羅唔到牌照將資產賣比母公司甩身走人。今次小股東無咁好彩，無個有水大股東填數，唯有自己食羅！

管貴過氣

然棄股拋物線形上升後似乎想打回原形，其實果時我已經出聲呢一期又係好似泡沫咁一鑊炒完。點解我咁肯定？或者我舉一個我親身的例子。

我家住三十年舊樓，一向都無煤氣，今年煤氣公司因為鋪管鋪到黎，同我間大廈商討入屋事宜。條件係如果有超過一半住戶安裝先至接駁入屋，而每戶入屋要收幾百元接駁費。最後當然唔夠戶數，主要原因係既然罐裝石油氣都用左咁多年，點解要比錢人地駁候入屋，仲要比更加費的燃料費？

一間公司依靠初裝費接駁費為盈利主體及資本性開支的融資未必係一個可行的商業模式。一來人地唔係奉旨用你，二來未見官先打八十，客戶係十分反感的，三來人有惰性，無著數根本無動力去轉，何況要嘔一舊錢？當然，果ｄ公司會話接駁費係同發展商收取的，問題係發展商唔係傻仔，點會任由宰割唔討價還價？一間公司沒有長遠而可行的商業模式，見到佢拋物線形上升，仲唔將佢當物咁拋？

再造北極

隔離多耳又係另一個奇怪的商業模式。公司部份盈利是以為客戶節省的電費作計算，辜勿論如何計算所謂節省了的電費，大家試從客戶的角度睇下：如果慳到的電費要雙手奉上比人，咁搞咁多野做乜？一種節能的產品，只能從購置或建造的過程中一次過賺錢，節能只能是一個賣點。如果產品是長收長有，小數怕長計，消費者也不是笨蛋。

而該公司的原材料要向大股東購買，有次不知是否收購多容用多左錢，竟然一次過賣天文數字的冷凍劑，數量足以用幾年，差唔多可以造多個北極。而多容的業績又係奇怪，通告描述到國內家電市場形勢如何惡劣，但業績又可以無厘頭地好轉，對於用常理解釋的東東，還是避之則吉。

落手好過用機器？

滴野因為被蘿蔔頭告佢侵權，由天堂開始跌到人間，偏偏這些現象往往發生在人人高唱天價之時，正奸會點解唔查下？電訊股江河日下，實在製造手機及其配件的公司又點可能獨善其身？從最近很多公司都計劃注入手機製造業務，可見一個明顯的行業頂部即將形成。

工業股襯行業高峰上市亦無可厚非，但為左上市講埋ｄ不合常理的故仔又真係太過份。該公司引以自豪的是生產線係半自動的，利用人海戰術降低成本，竟然可以超越全自動化的同行。講真，用咁多人手，點樣做ＱＣ？邊個夠膽保證產品的質素？
條數點計？

講左幾個針對個別公司的怪談，就講一個普遍性的現象。有無留意很多聞屁股的估值？尤其是某些所謂高科技產品、新藥、專利權等，動輒估值數以億計，無可避免製造大量商譽，但係呢類公司乜都可能有，往往最無的又係「商譽」。買入者唔知幾時先至「傷癒」。