類似的資金推動市，過去時有發生，次次都係衰收尾，此無他，資金流竄的目的唔係為左炒高個市打救世人，而係搵錢，邊度有錢搵就去邊度，對任何一個市場都係無感情的。而佢地衡量價值的角度亦同一般的投資者不同，佢地唔係尋找「絕對」的投資價值，而係尋找「相對」的投資價值。舉一個例，當某地股票P/E係14倍時，而另一地的P/E係16倍時，佢地就會湧去；但當炒到去18倍時，即使基本因素沒有任何改變，資金也會義無反顧地流走。又或者當另外一地P/E跌到13倍時，亦可能會出現這些情形，所以不要問「香港基本因素無乜轉變，點解熱錢會走？」

當然資金撤走唔係次次都用相同的方式，聯交所成立前曾出現過兩次資金推動市──1973及1980-1，當時沒有衍生工具，自然亦唔會有期指期權影響市場，以1973年為例，資金不是留到最後一刻才走，最後一段升市根本係香港人自己鬼打鬼，外資唔會持有以百計P/E的落後地區股票，而是由假股票同石油危機一齊督爆。又如1980-1年果次，係本地及南洋（主要是佳寧）的炒樓資金入市，由於第一浪1980年升到1800點水平仲未走晒貨，到1981再炒多次更高水平才散水。

衍生工具的影響首見於1987年，當時個個炒期指都唔一定知道自己做緊乜，淨係知道升市就造好倉，雖然事後發覺唯高達詹金寶等四大行造左大量期指淡倉，但無人知道佢地幾時造，而以當時的市勢，如果一早造，就會像呢期淡友一樣，夾扁都未報到仇。所以單單睇衍生工具的動勢能否幫助捕捉資金市的方向，令人不無懷疑。

又如1998股災，外資不是造好，而是造淡，呢種新玩法更加新奇，一面沽港元一面掟股票，籌旗造期指淡倉，這個循環比造好更完美，因為沽貨得來的錢可以做按金，唔似造好咁，一面要用錢買股票，一面要用錢造倉，所以呢個遊戲1998年玩左半年，2000-2003年差唔多玩左三年。

目前的半年升市其實是這些狂升暴跌的市場遊戲的翻版，再加上人民幣升值的因素，個人唔會認為真係有咁多人博一個半封閉軟貨幣升值，那麼應作何解釋？大家只要留意今年中國資本性開支大增，外資入華唔係炒貨幣，而係直接間接投入了資本性開支，當然，這些所謂外資有相當部份是「假外資」回流，這些流入了的資金是否能避過外匯管制而自出自入呢？恐怕就像新世界果幾百億國內資產，凍結在國內，更加恐怖的係，由於胡亂起哄重複建設而成為大白象，就像磁浮玩具一樣。

那麼這500點跌市是否足以引發綿延不斷的跌市呢？相信目前言之過早，一來由於現貨未平倉的期指雖然由九萬減少到七萬幾，但加埋下月期指過萬張，兩數相合減幅並不大，二來雖然跌了500點，但仍然遠高於月初的水平，好友只是「賺少左」，仍未犯本，淡友只是「輸少左」，仍未翻身，如月尾結算大量倉位透過自動平倉，再加上少人轉倉到下月，才能觀察到資金的流向，但看到也未必有用，無人知佢地下一步去邊，點做。