人類的心理便是這樣，股市上升，從來無人話香港財富股票市值升左幾多千億，跌市的時候卻頻頻說唔見左幾多百億。濠賭股升幾倍從來無人過問，跌果一兩成三四成，低位買入的人仲有大把利潤，卻有大把人瓜呱呱叫。又唔唸下下跌果ｄ都係無厘頭從空氣中製造的財富。口中如此，行為上卻剛剛相反。升市時個個搶，跌市時卻個個坐響度發夢，唔係諗住走避，唔去保護自己，自然死得人多。

股價點解會上升，撇除晒甚麼技術分析、基本分析、內幕消息、各式其式，只有一個原因：買的人多過賣的人，而且最重要係買的人出得起價；相反，一隻股票跌價，亦只有一個原因：賣的人多過買的人，而且最重要係賣的人唔錫價，買的人反而唔係咁重要，因為只要無買家，一隻股票係可以乾跌，一分鐘跌幾十個價位有之，甚至日日人開沽價，而日日都無人承價，好多跌到只有一仙的窩輪就係咁。簡單講，股價升係要有人用錢買佢上去，跌並不需要有人用股票掟散佢，只要無人接便可以。

此所以，買股票或窩輪都好，如果睇升，一定要有一個理由有人用更高價接貨。炒概念也是這個原理，概念可以有實質或者純粹吹水，只要有人肯用更高價接貨便可以。如果無人用錢去BUY（買）呢一個概念，就算有實質都無用，所以即使一些所謂有實質澳門業務的公司，又假設呢個業務真係搵到錢，再假設埋佢的買入價係好合理的，無搵小股東笨又如何？只要市場唔BUY呢個概念，就講乜都多餘，何況呢ｄ咁美好的情形極少極少可能發生。

大家唔信的話，我可以舉兩個例子：其一係黃創山家族的寶光及泰華榮，當時係九十年代，興炒泰國概念，黃氏家族「好好人」，用一個當時極廉宜的價值錢將泰國地產項目注入，股價無反應，其後黃氏家族及其上市集團如骨牌般倒下。另一個例子以前都講過，就係丁謂用「監平監賤」的價格將勝家衣車注入善美，股價又係無反應，結果又係整系公司火燒連環船。

此所以，當一個概念變成明日黃花，市場唔再接受時就講乜野都無用，低價注入，甚至免費送都無人出更高價買。這個澳門狂潮當「澳門地下特首家族」出黎講野，仲有無人會用真金白銀去買呢個概念？就好似夏威夷咁，理你後生時好似葫蘆樽薄荷酒，一個黃左的夏威夷仲係唔係咁顛倒眾生？等待一個概念重生，同等待一個人返老還童一樣，唔係話你查下護膚品就36歲變26歲，26歲變16歲，16歲變6歲嗎？

同意這些道理，在跌市中的生存之道便不是減低損失，而係保留實力，概念即使再由低位反彈多少，也是以清貨為大原則，不要因為彈返少少而希望平手甚至獲利離場，正如海嘯退卻，反而是為下一個巨浪作準備。當一些冷門股下跌的時候，往往是找不到人接貨，沽貨的人會不斷咁降低叫價直至有成交，掛現價出售往往得個掛字，如果貨底多，往往就算成到也只是部份成交，因此，決心清貨的話，掛低幾個至十幾個價位就更佳，因為電腦會自動為你找到最高價的對手成交，可以爬晒其他人頭。不要為執返隻鞋而被大浪捲走！

至於希望買PUT輪執死雞的朋友，請留意在單邊跌市中，窩輪的溢價可以升到好快，當跌幅收窄時單係窄溢價已經可以令獲利率大減，因此要小心計算入價的溢價，溢價太高，年期太短，成交欠活的PUT並不是取勝之道！

所謂「賣仔莫摸頭」，當你下了決心走左貨之後，請不要再回頭睇股價。經驗告訴我們，當你賣完之後見個價升你會入貨搏反彈，個價跌你會走去溝貨報仇雪恨，結果都是一樣，就是丟入浮沙之中不能自拔。正如希臘哲學家話沒有人能兩次走進同一條河（因為河水已經流走），「呢度跌低呢度企返起身」係害死人的謬論。

至於坐艇當比回佣，輸錢當交學費，對不起，閣不是在投資或投機，而是鬥氣。