「食住花生等睇戲」，其實即係袖手旁觀，例如行到街上，見到兩幫人正想講手，或者情侶鬧交，精仔唔會做和事佬，蠢仔至會加把口。兩雄相遇，不分伯仲，企錯邊固然大鑊，企中邊都未必有著數。散戶投身市場，也要學會有些時候做旁觀者，否則兵荒馬亂，恐妨殺錯良民！
一種普遍流行於散戶之間的思維是，輸左錢睇錯市，錢一定係比大戶贏左，做了大戶的點心。事實上一個成熟市場，係大戶同大戶撕殺，小戶成副身家交出黎，都唔夠人地分花紅。所以唔好成日諗住同「大戶」做對家，大戶同大戶開片，散戶只係搭順風車，邊邊大力就騎邊邊。
既然係咁，投資投機要順勢，先要搵出方向同位置，所謂方向就係好淡，所謂位置就係產品。當大市窄位徘徊，或者成交疏落牛皮時，又點知方向？正如兩隊人拔河，如果只係見到中間個繩結無乜點郁，一係就兩邊差唔多咁大力，一係就根本兩邊都無乜人拉，咁的形勢渣倉得個等字，仲要係令人患得患失果隻。在這種市況之下，有倉同無倉的分別，只係有倉者的心理壓力比無倉者大，以及很容易形成主觀心理。市況明明是沒有方向顯示的，卻因為自己持有好淡倉而影響了客觀判斷，經驗告訴我們，有心理壓力之下作出的決策事後往往係證明是錯誤的。
即使能判斷方向，有時選錯了投資投機對象，亦會令人望門輕嘆，就以現時的市況來說，做恆指同國指就有很大分別了！亦有很多人試過明明大市在動，同類股亦在動，為何自己買的股票不動？所以要找出當時得令的產品。如何找？筆者的經驗是看成交，成交活躍的股票，才會多人留意，多人玩。反之一些成交疏落的股票，無錯有時一日升幾成，但是成年至升幾日，多數時間是牛皮，即使看中也要驚無人接，又何苦來哉？
甚麼時候應離場觀望？筆者認為以下情況要考慮：
～長假期前後
～結算前後
～成交疏落
～窄幅牛皮
～隔日大幅上落
～沒有明顯的一浪高於一浪或一浪低於一浪的市勢
～關前莫持倉（即在支持阻力位間穿插）
投資／投機唔係返工，無話越勤力越有用，市況不明之下妄圖僥倖，與其說是把握機會，不如說是滿足一己的虛榮心，在「花生市況」中，持倉或不持倉的唯一分別，是前者自我剝奪了選擇的機會。