香港人勇於打破紀錄，挑戰別人。老公教唆老婆呃單親綜援「壹年久遊」已經足以震驚全港，今日又有人打破了該紀錄：「半年柒遊」。
香港出名多精仔，窮有窮精，有錢有有錢精，公務員洗底做公職當然就係精仔中的精仔。公款探親，屋企當酒店支數，呃埋飛行里數，相比於「豪宅扮貨倉」又更上一層樓。所謂血濃於水，親疏有別，乖乖地做電兔比賽狗追喇！
報紙的另一邊，貨倉正被重型建築機械拆毀，不惜工本務求盡快毀屍滅跡。其實香港仲有好多「忠心」的公務員，天文台長死撐固然是一絕，表哥死撐係第二絕，居然仲有第三絕係有人想追收地租差價。咁有種的，遲ｄ唔好話比市民聽用作紀錄的菲林或者電腦檔案全部被毀或失蹤，死無對證。
對於呢類「攫金之時，不見人，徒見金」 的民族精英，網上找到了兩段文字：
港燦筆記
呢類社會賢達之所以成為社會賢達，其中一個條件，就係佢地響某專業行頭 “得高望重”，或所謂 “成功既專業人士”。專業人士要做到 “成功”，懂得從佢個行既準則及相關法規尋找漏洞，或從呢大堆準則中，摸索到一套與政府有關部門討價還價既秘技，善加利用，因而被各大財閥賞識，被捧為該專業的 “帶頭大哥”，再利用 “大哥” 既身份踏上公職王之路。
正因呢班行業精英既訓練係盡量利用行業中有關條文既灰色地帶，就算被傳媒踼爆佢地 “走精面” 既行徑後，佢地多數死撐自己無錯，要最高統帥劃公仔劃到出腸至肯辭去公職。
當之後佢地重有手尾跟，被檢控，受到法律制裁，都唔好預佢地知錯能改。”走精面” 響佢地部字典裡既定義等於 “搵食既本能”，不存在 “道德” 或 “不道德”。大吉利是斷正入冊都好，呢班 “精英” 亦只會賴個辯護律師渣，或時運低。
專收叻仔
已過世的評馬人董驃說馬場專收叻仔。其實，將之擴大到香港也一樣適用。
港式叻仔「成功之道」，在於「搏盡」，能在灰色地帶中遊走，爭取最高利益。然而，香港人雖習慣這處世態度，可卻又喜歡站在道德高地口誅筆伐任何「曝了光」的此類行為。加上，「憎人富貴厭人貧」及「落井必然下石」是城巿的金科玉律，叻仔們在這裡生存，真的要唯謹唯慎，還要銘記「人怕出名，豬怕肥！」當然，不出名有時又爭取不到一些利益，矛盾啊！
當然，同祖國果ｄ銀行分行行長，海關關長們的朋友之類相比，呢ｄ只係「女兒掉下來的餅碎」。其中顯示的一種欠缺自律的貪小便宜心態，呢類人似乎搵錯工了！私人企業打工皇帝，納稅都億億聲喇！高生（唔係高有乜果班）都識搵個笨老婆代坐監，呢ｄ中材咪唯有貪下ｄ小電器、文具、飛行里數之類囉！
文首講左三絕，其實仲有第四絕：個乜乜私處話，要等法庭判決才決定是否發放酬金。佢地一定好滿意木木的表現，為民表率，各有各貪，如果唔係真係唔知響度考慮緊ｄ乜野？