終於有個香港人出任聯合國呢個多講少做或者常被會員騎劫的「國際newsgroup」版主。軍政谷多次被美國呢一位會員挾住個名黎打人，咁衛生谷比人口最多的國家的代表過下版主癮都得掛？出奇地香港人並不熱烈歡迎，除網上即時大量喝倒彩聲外，報紙上更有界別代表大篇幅口誅筆伐再加上含沙射影，報紙又訪問沙士家屬有乜野感想，得到的答案是「恭喜佢囉！」。

連受害遺屬都識得大體回應，一般廣大市民唔知同呢個代表有乜野深仇大恨，一般人的正常反應是如果有自己國家民族或城市的人獲享殊榮，理應與有榮焉；如果呢個人做得唔夠好或者有困難，應該指正下佢，或者鼓勵下佢比心機做好ｄ。香港許多人卻偏偏睇報紙比反應，報紙寫乜佢地就諗乜同講乜。果位女士的確唔係做得夠好，但將沙士役情甚至299條人命算在佢頭上就十分搞笑，彷彿如果唔係呢個人坐呢個位，換轉第二個一定唔會有役情或者唔會有人死，講真，要追究幾乎當時成個醫療行政架構人人有份，咁係唔係即係所有香港醫療行政架構的所有人都無運行？

更加可笑的是有報紙講國家花費400億來「買」呢個位，居然呢種講法大有市場。阿諾舒華辛力加做過一套戲，有個侏儒同佢係孿生兄弟，原來呢個係一個失敗的實驗副產品。係唔係爭衛生版主呢筆錢都係要出，講到國家為呢件事而大破慳囊，講果個可能別有用心，信果個好明顯係無知幼稚。

說完沒由來的恨，就是沒有來的愛。近日有港澳聞人辭世，居然引起了廣泛港人的敬意。老實說，唔係話老先生不值得尊敬，但傳媒一面倒的有讚無彈卻帶來滑稽的感覺。筆者等了幾日，都沒有一個人行出來講過一句「另類聲音」，例如說走私或偷運貨品是違反當時法律，對小朋友會有不良影響之類的廢話。乜佢地唔係成日都咁講野咩？原來有報紙刊出某政黨多人對老先生的評語，接著口徑便是有讚無彈。電視顯示出殯當日有市民在街頭哭到如喪妣考，彷彿與老先生好熟稔，識左好多年依依不捨咁。

呢ｄ只係感情無處寄托的現象，最近有重量級演員急病入院，他日有事相信又會有一大堆人出來沒由來的如喪妣考，正如當日大姐大歌星大去一樣。其實呢ｄ人如果真係至親好友離去，究竟要傷心到點呢？還是要視乎寄托多少感情才去做反應呢？

正如香港某些人聽到國家出現危難，反應居然是幸災樂禍，神國出事反而喊埋一份，似乎要沒有親疏遠近才顯得公正無私。