早幾日寫了一篇「後母／繼子情意結──向馮道學習(2008/01/23)」，而家有跟進：那位Tracy小姐搵到份工，條件不俗，但又聽人講辦公室政治十分厲害，恐怕自己難以招架而苦惱。

睇返之前佢走的原因，是怕新老細唔信佢而無運行，咁即係本來無人迫害佢的，只不過佢認為在全新的政治形勢下「前程似咁」。咁查實佢轉工並唔係因為Office Politics，而係要求「前程似錦」。一如上次咁講，大地震無你份，一係你唔起眼，一係你無問題。你唔起眼咪「前程似咁」，你無問題咪「前程似錦」，呢ｄ純粹個人選擇。

「又想有運行，又唔想搞政治」得唔得呢？筆者被人告知公司好多office politics，咁就去觀察下喇！咦？睇黎睇去都唔見既？後尾至知在好多小人物如筆者般的眼中，阿邊個唔同阿邊個唔一齊食飯，或者阿邊個同阿邊個講是講非都被定義為「辦公室政治」，咁阿哥同阿妹爭廁所或者老豆怪阿媽煮ｄ野唔好食都係office politics喇！你認為佢係，佢咪係囉！

小人物有小型的office politics，咁上到高層的就唔係雞毛蒜皮，例如某件事被人一味拖，或者出左事互相卸責，呢ｄ根本就係辦公室的常態，正如森林入面獅子老虎食綿羊一樣，好多時唔係ｄ人鍾意玩呢樣野，而係為勢所迫，你要保護自己，又要防人，又要諗下人地會唔會害自己，係唔係好煩？

羊食草，虎食羊，人獵老虎剝皮拆骨，辦公室食物鍊越高層，越要應付高層次的人際鬥爭同挑戰。唔想搞office politics，唔好做咁高級囉！以前公司有個茶水阿嬸，可以日日發惡鬧人，無野做就訓覺或者聽收音機，無人會去自貶身價去搞佢，不過咁，凡事有利鈍，裁員第一個就炒佢，食得咸魚抵得渴。

人生無時無刻面對取捨，辦公室小人物想小煩惱，就要明白呢個道理，否則只是自尋煩惱。