今時今日已經少左人講港男港女，書展見到本《港男港女爛Gag》亦唔見得好多人買。得閒都去買o靚模寫真集喇！少左人理並不表示消失，在筆者眼中，所謂港男或港女，是某些低劣香港男女的代名詞，只不過以男女求偶作為包裝。港女式待人接物惡劣態度，其實不限於港男求偶的時候展現，買燒味飯或叫杯許留山的時候一樣不放過。至於標準港男式低劣行為，例如在新聞報導時舉牌或者在簽名會時擲書而引為畢生成就，只是五十步笑百步。
《AM730》今天港男專欄抄一首詩作一段回應，只能算是老生常談，但筆者卻從另一角度看。在生意商談中，故意流露惡劣態度以爭取更多談判籌碼，是常見的手法，目的是提高叫價，而不是令談判不能進行。到生意達成協議後，如雙方仍不收回其惡劣態度及苛刻條件，最終生意都是無法做下去。正如中國與澳洲及巴西鐵礦商談判，明明已傾好價錢，巴西淡水河谷卻反價，結果就是中國停止進口巴西鐵礦。
以之來看小事如男女求偶，女方為試男方的誠意而故意刁難亦無可厚非，但兩人成事後仍以高高在上的姿態而視為理所當然，甚至引以為沾沾自喜炫耀天際。如果這樣都不出事的話，只有兩個原因：賣方開錯價，或買方條件太差。從港女的角度，兩樣都是「蝕左底」，但實質上又是否如此？
某些自以為具有商業優勢的機構亦用這種手法做生意，比如只支付訂金，工作完成後，就用各式各樣的方式延遲收貨，進而拖延甚至扣除款項，結果就是越來越少人與這類機構做生意，留下者為求生存，只有將貨就價。另一些機構則以「價低者得」為商談條件，卻不考慮對方供給的條件。生意之道是「用最少代價得到最好最多的條件」，這些機構卻只看到上半句，結果就是「用最低的價錢購入垃圾」。兩者結果亦相同：公司的產品及服務日益低下，遲早失去客戶支持，心水清的讀者應已會心微笑。
相似情況套用落港男港女身上，港女的盛氣凌人高姿態只能吸引低質港男，男人大丈夫稍有骨氣都不會長期容忍沒由來的屈辱。同樣道理低質素港男連北上都無所獲，才會長期抬不起頭來做人。港女一方面以徐女士梁小姐為目標，又不去想想他們在兩位李生面前有無可能是「港女格」呢？稍為有條件的人都避而遠之，港女趕客而不自知。
港男亦且慢高興，上一代要忍受皆因沒有選擇，今天小河以北佳麗如雲，小河以南女多男少，也要如此這樣，究竟係性喜被虐，還是技不如人呢？廿幾三十歲仲以Kidult為榮顧盼自豪，Kid就真係Kid，Adult就唔多似。
俗語有云：「阿蘭嫁阿瑞，累鬥累」，筆者就挑破這句話的含蓄性：「阿爛當然嫁阿衰，港女理當配港男」。
港男達人(達人): 港男，一路好走
「有又煩，無又煩，做人男友甚艱難。
扁咀黑面當食飯，今日唔知衰邊瓣。
貪靚識食起得晏，奉旨遲到眼不眨；
公主脾氣壞心眼，一句講錯把枱反！
彥祖碧咸作典範，戇直電車靠邊站；
『妙妙』『沽遲』是門檻，無樓無車請節省。
早晚接送使喚慣，千金散盡作等閒；
搵埋唔夠餵兩餐，投胎最忌做港男！」
有師兄W送來《港男之苦》詩一首，正所謂獨食難肥，忍唔住又分享一下。坦白講，裡面講嘅唔係乜嘢新鮮料，十個有九個師兄都領教過，無謂解讀，費事又俾港女同盟聲討，不如今日，持平些少，由細佬扮港女辯護吓！
「唓！咁艱難當初你又追？無人攞把刀迫你㗎！成班friend裡面，哨牙珍夠好脾氣啦，你又唔吼，又話人扒！係都要媾我？媾到又要呻，我大小姐由細到大都係咁㗎啦，阿爸都就晒我，我使鬼顧你感受？你頂得到咪頂囉，一句到尾，你唔鍾意我，仲可以鍾意邊個吖？仲有呀，問人唔知自己衰邊瓣？不如問吓自己做啱邊瓣仲好啦，正傻仔！
哼！話我哋有公主病？你先至有病！呢啲叫做air，即係氣質，係先天培養，後天栽培先至有嘅，你哋啲電車男同龍友唔係最鍾意嘅咩？我响書展同商場見到啲港男喪追?模，同互相分享照片嗰個流口水樣，就知道香港男人玩完！佢哋連見到嗰啲MK look嘅?模婢女都咁騰，咁對住我哋呢啲有學識同姿色嘅叻女公主，咁實鼻水胃酸都倒流啦，記住：受少少閒氣，係最低消費！
港男成日投訴我哋崇拜名牌，又係五十步笑一百步，請問聲sony同microsoft係唔係名牌？Intel同Nintendo又算唔算？如果答案係yes，咁港男咪一樣係名牌嘅奴隸，不過佢哋啲牌子唔叫做LV、MiuMiu、Gucci啫！仲有，佢哋等game出等figure咪好似我哋等下一季手袋一樣，北上買老翻game咪等於我哋買A貨，所以罪名不成立，因為大家都彼此彼此！
至於無車無樓無cash追唔到女仔，梗係唔關港女事，點解？你儍㗎？亞視無收視，叫做經營不善，可唔可以賴觀眾呀？你無料到吖嘛，我梗係睇無綫啦！壟斷？你有病呀？成個香港都一早俾地產商壟斷啦，依家至投訴，安心上路，一路好走罷啦，港男！」
港女敬上