筆者以前講過女人如何釣金龜，其實不離「打江山」與「坐江山」：

千里馬不騎胭脂馬──女性如何投資男性(2008/01/15)

 

今天字母數字報宅男專欄又同樣地講呢類問題：

 

專欄 – 港男達人(達人): 港女不可貌相 (P.27)

上星期五，同位舊女同學到酒樓下午茶，Amy姐佢早年馳騁中環銀行界，係OL界又叻又靚嘅代表，嫁人後相夫教子，不吃人間煙火，平時High tea同shopping吓又一日，絕對係港女嘅目標同超級典範，多得有facebook，我先至約到佢敘舊，仲俾我知道，原來唔係淨係靚就可以嫁得好！

嗰日喺我哋坐嘅三張枱外，有一枱女人，年紀由20至30之間，我本來唔會留意佢哋，但係佢哋不停高談濶論，聲浪隨著埋單人數漸多而升高，逐漸到達滋擾程度。而佢哋五個人之中，最令人討厭，最大大聲同埋郁手郁腳講嘢嘅，竟然係最睇得入眼，最靚女嗰個！我不妨形容一下嗰位港女，佢一頭長髮，眉清目秀，薄施脂粉，講唔上大家閨秀，但肯定係小家碧玉，身材勻稱，係一般港男拒絕唔到嘅水準，連小弟都係佢未開聲之前都望過幾眼，誰不知，有啲港女唔開口由自可，一開口就魚蝦蟹齊全！

嗰位港女拍枱講：「嗰條八婆我使Q同佢客氣？」佢無正式字正腔圓講粗口，但配合聲調語氣，仲煩厭過正式嘅粗口。小弟一直忍，但我點都接受唔到呢亭字眼會出自呢位小姐口中，嗰份打擊十足十好似玉女掌門人同你爆粗一樣，你會沮喪多過憤怒！

Amy姐鎮靜地望過去，嘆咗口氣，同我講真係好可惜，佢話唔明白點解依家啲女仔喺公眾場合會咁無儀態，尤其係大聲講說話同傾電話，無論喺地鐵同餐廳都成日見到。我話其實男仔都係咁，但係佢話唔可以咁比較，因為女仔要比男仔講究談吐同儀態，呢啲係社會嘅約定俗成標準，唔需要男女平等！

佢話細個嗰陣，阿爸唔俾佢著拖鞋落街買嘢，但係依家就見到啲後生女著人字拖去人屋企，佢睇唔慣，因為涼鞋同人字拖係兩樣嘢。

佢話嗰時阿媽仲會教佢約會唔好成日著牛仔褲；提醒佢飲奶茶嗰陣記著拎起隻杯碟；仲有飲汽水一定要倒出嚟用杯飲。

佢話呢啲manner越嚟越少女仔注意，甚至有人覺得老土添，但係其實所有都係禮貌，同埋尊重對方嘅表現，好多大戶人家，或者有教養嘅屋企都好注重，如果唔識就會失禮自己同父母，就算俾你釣到金龜，都修唔成正果，各位港女，你哋又肯唔肯聽吓師姐指點呢？

筆者就認為只知其一不知其二，無錯，好多所謂大戶人家都鍾意金絲雀，但係一樣有好多男人鍾意女中豪傑，尤其是打江山一類的男人，唔一定要搵個四奶奶翻黎開山劈石，起碼唔想要三奶奶咁懶係要人照顧果類，至於大奶奶果類扮晒大家閨秀卻係笑裏藏刀，有錢人亦唔鍾意比佢地埋身。

此所以怎麼樣的人就會有怎麼樣的結果：堂堂正正講正字粗口都仲算係女中丈夫，扮晒野講懶音粗口的只會吸引扮晒野的空心老棺，至於所謂唔著拖鞋牛仔褲飲茶拎起隻碟，最終亦會歸入天唔到地唔到的中產小家。真正豪門望族之後是怎樣的？請看看女性雜誌中何福先生的後人，是不是這樣的「中產」？

還是那一句：妳想做廢人就活得似個廢人，妳想入侯門就預左下半世渣住條頸，妳想一統江山平分天下，請照照鏡看看自己有乜野本事！靚，如果用黎搵錢可能係有價值（無論從事任何行業），但靚係絕唔會變一個江山出來。

宅男睇野永遠困在一己的小視野中，期期都見佢同佢ｄ師兄弟為媾女而煩惱，如果佢地用咁的毅力試下打個江山出黎，開間公司做小老細又好，小小地在大公司撈個部門小主管出黎都好，到時就係為揀女同撇女而煩惱，而唔係36歲仲要為個酒吧識的女仔十五十六。